Ўтган йил мобайнида Фармацевтика маҳсулотлари хавфсизлиги марказига Ҳуқуқни муҳофаза қилиш органлари ва тиббиёт ташкилотлари ҳамда фуқаролар томонидан дори воситалари ва тиббий буюмларни экспертиза қилиш юзасидан 1671 та мурожаат келиб тушган.
Ушбу мурожаатлар асосида тақдим қилинган фармацевтика маҳсулотлари ўрнатилган тартибда лаборатория текширувидан ўтказилган. Таҳлил натижаларига кўра 6 304 турдаги 1 334 598 ўрам дори воситаларининг тиббиёт амалиётида қўллаш мумкин эмаслиги, 2288 турдаги 542 709 ўрам дори воситаларининг мувофиқлик сертификатлари мавжуд эмаслиги, 241 турдаги 11 747 ўрам дори воситалари ёрлиқлаш кўрсаткичи бўйича номувофиқлиги, 152 турдаги 1278 ўрам дори воситаларининг яроқлилик муддати ўтгани, 68 турдаги 7029 ўрам дори воситаларининг қалбакилаштирилгани аниқлангани тўғрисида экспертиза хулосалари берилди. Шунингдек, ушбу сифатсиз, қалбакилаштирилган ҳамда Ўзбекистон Республикасига ноқонуний кириб келган фармацевтика маҳсулотлари айланмасининг олди олинди.
1319 номдаги фармацевтика маҳсулотлари давлат рўйхатидан ўтказилди
2023 йил давомида маҳаллий ишлаб чиқарувчиларнинг 204 номдаги дори воситаси, 44 номдаги тиббий буюм ва тиббий техникаси, шунингдек, хорижий ишлаб чиқарувчиларнинг 214 номдаги дори воситаси, 857 номдаги тиббий буюм ва тиббий техникаси давлат рўйхатидан ўтказилди.
Давлат рўйхатидан ўтган дори воситалари, тиббий буюмлар ва тиббий техника ҳақидаги маълумотлар барча учун очиқ ҳисобланади.
Эслатиб ўтамиз, дори воситаларини, тиббий буюмларни ва тиббий техникани давлат рўйхатидан ўтказиш натижаларига кўра Фармацевтика маҳсулотлари хавфсизлиги маркази томонидан хорижий ишлаб чиқарувчиларга амал қилиш муддати беш йил, маҳаллий ишлаб чиқарувчиларга муддатсиз бўлган тегишли рўйхатдан ўтказилганлик гувоҳномаси берилади.
Гувоҳнома дори воситалари, тиббий буюмлар ва тиббий техниканинг давлат рўйхатидан ўтказилганлигини ва Ўзбекистон Республикаси Соғлиқни сақлаш вазирлиги томонидан тиббиёт амалиётида қўлланилишига рухсат берилганини тасдиқловчи ҳужжат ҳисобланади.
Дори воситалари таркибини текшириш назорати кучайтирилди
Бугунги кунда Ўзбекистон Республикасида дори воситаларини ишлаб чиқариш фаолияти билан шуғулланувчи умумий 92 та, дори воситаларининг улгуржи реализацияси билан шуғулланувчи 538 та корхона ҳамда дори воситаларини дорихона шароитида тайёрловчи 141 та дорихона фаолият юритмоқда.
Ҳозирги кунгача Фармацевтика маҳсулотлари хавфсизлиги маркази ва унинг филиаллари лабораторияларида 1000 дан ортиқ сериядаги дори воситалари таркибида этиленгликоль ва диэтиленгликолни аниқлаш синовлари амалга оширилди.
Марказ томонидан келгусида дори воситаларининг ножўя таъсирлари тўғрисидаги тезкор маълумотлар базасини шакллантириш ҳамда ножўя таъсирлар тўғрисидаги хабарларни ваколатли органга реал вақт режимида тезкор етказиш тизимини жорий этиш режалаштирилмоқда.
49 956 сериядаги фармацевтика маҳсулотларига мувофиқлик сертификатлари расмийлаштирилди
Фармацевтика маҳсулотлари – Техник жиҳатдан тартибга солиш соҳасидаги норматив ҳужжатлар талабларига мувофиқлиги тасдиқланиши мажбурий бўлган маҳсулот ҳисоблангани боис, қонунчиликда ўрнатилган тартибда аккредитация қилинган, фармацевтика маҳсулотларининг белгиланган талабларга мувофиқлигини тасдиқлашга оид фаолиятни амалга оширувчи сертификатлаштириш органлари томонидан сертификатлаштирилади.
Амалдаги тартибга мувофиқ, давлат рўйхатидан ўтган ва импорт қилинган дори воситаларининг ҳар бир серияси сертификатлаштириш жараёнидан ўтади ҳамда ҳар бир серия маҳсулотга мувофиқлик сертификати расмийлаштирилади. Сертификатлаштирилмаган дори воситаларининг божхона ҳудудидан олиб чиқилишига ва реализация қилинишига йўл қўйилмайди.
Тиббий маҳсулотларни сертификатлаштириш органлари томонидан 49 956 сериядаги 1 043 401 555 шартли ўрамдаги дори воситалари, тиббий буюмлар ва тиббий техника учун мувофиқлик сертификатлари расмийлаштирилди. Бунда 788 сериядаги 58 494 238 шартли ўрам дори воситалари, тиббий буюмлар ва тиббий техниканинг номувофиқлиги аниқланиб, ушбу маҳсулотларга мувофиқлик сертификатлари расмийлаштириш рад этилди.
Таъкидлаш жоиз, ўрнатилган тартибга мувофиқ, Ўзбекистон Республикаси ҳудудига олиб кириладиган дори воситаларининг ва тиббий буюмларни сертификатлаштириш синовлари натижасида қўллаш учун яроқсизлиги аниқланган бўлса, бундай дори воситалари ва тиббий буюмлар Ўзбекистон Республикаси божхона қонунчилигида белгиланган тартибда Ўзбекистон Республикаси ҳудудидан ташқарига чиқариб юборилади (реэкспорт) ёки божхона режимида жойлаштирилади ва йўқ қилинади.
Дори воситалари, тиббий буюмлар ва тиббий техникалар учун берилган мувофиқлик сертификатлари ҳақида Фармацевтика маҳсулотлари хавфсизлиги марказининг расмий веб сайти (Ягона ахборот тизими)дан маълумот олиш мумкин.
Моҳигул Қосимова, ЎзА