O‘tgan yil mobaynida Farmatsevtika mahsulotlari xavfsizligi markaziga Huquqni muhofaza qilish organlari va tibbiyot tashkilotlari hamda fuqarolar tomonidan dori vositalari va tibbiy buyumlarni ekspertiza qilish yuzasidan 1671 ta murojaat kelib tushgan.

Ushbu murojaatlar asosida taqdim qilingan farmatsevtika mahsulotlari o‘rnatilgan tartibda laboratoriya tekshiruvidan o‘tkazilgan. Tahlil natijalariga ko‘ra 6 304 turdagi 1 334 598 o‘ram dori vositalarining tibbiyot amaliyotida qo‘llash mumkin emasligi, 2288 turdagi 542 709 o‘ram dori vositalarining muvofiqlik sertifikatlari mavjud emasligi, 241 turdagi 11 747 o‘ram dori vositalari yorliqlash ko‘rsatkichi bo‘yicha nomuvofiqligi, 152 turdagi 1278 o‘ram dori vositalarining yaroqlilik muddati o‘tgani, 68 turdagi 7029 o‘ram dori vositalarining qalbakilashtirilgani aniqlangani to‘g‘risida ekspertiza xulosalari berildi. Shuningdek, ushbu sifatsiz, qalbakilashtirilgan hamda O‘zbekiston Respublikasiga noqonuniy kirib kelgan farmatsevtika mahsulotlari aylanmasining oldi olindi.

1319 nomdagi farmatsevtika mahsulotlari davlat ro‘yxatidan o‘tkazildi

2023 yil davomida mahalliy ishlab chiqaruvchilarning 204 nomdagi dori vositasi, 44 nomdagi tibbiy buyum va tibbiy texnikasi, shuningdek, xorijiy ishlab chiqaruvchilarning 214 nomdagi dori vositasi, 857 nomdagi tibbiy buyum va tibbiy texnikasi davlat ro‘yxatidan o‘tkazildi.

Davlat ro‘yxatidan o‘tgan dori vositalari, tibbiy buyumlar va tibbiy texnika haqidagi ma’lumotlar barcha uchun ochiq hisoblanadi.

Eslatib o‘tamiz, dori vositalarini, tibbiy buyumlarni va tibbiy texnikani davlat ro‘yxatidan o‘tkazish natijalariga ko‘ra Farmatsevtika mahsulotlari xavfsizligi markazi tomonidan xorijiy ishlab chiqaruvchilarga amal qilish muddati besh yil, mahalliy ishlab chiqaruvchilarga muddatsiz bo‘lgan tegishli ro‘yxatdan o‘tkazilganlik guvohnomasi beriladi.

Guvohnoma dori vositalari, tibbiy buyumlar va tibbiy texnikaning davlat ro‘yxatidan o‘tkazilganligini va O‘zbekiston Respublikasi Sog‘liqni saqlash vazirligi tomonidan tibbiyot amaliyotida qo‘llanilishiga ruxsat berilganini tasdiqlovchi hujjat hisoblanadi.

Dori vositalari tarkibini tekshirish nazorati kuchaytirildi

Bugungi kunda O‘zbekiston Respublikasida dori vositalarini ishlab chiqarish faoliyati bilan shug‘ullanuvchi umumiy 92 ta, dori vositalarining ulgurji realizatsiyasi bilan shug‘ullanuvchi 538 ta korxona hamda dori vositalarini dorixona sharoitida tayyorlovchi 141 ta dorixona faoliyat yuritmoqda.

Hozirgi kungacha Farmatsevtika mahsulotlari xavfsizligi markazi va uning filiallari laboratoriyalarida 1000 dan ortiq seriyadagi dori vositalari tarkibida etilenglikol va dietilenglikolni aniqlash sinovlari amalga oshirildi.

Markaz tomonidan kelgusida dori vositalarining nojo‘ya ta’sirlari to‘g‘risidagi tezkor ma’lumotlar bazasini shakllantirish hamda nojo‘ya ta’sirlar to‘g‘risidagi xabarlarni vakolatli organga real vaqt rejimida tezkor yetkazish tizimini joriy etish rejalashtirilmoqda.

49 956 seriyadagi farmatsevtika mahsulotlariga muvofiqlik sertifikatlari rasmiylashtirildi

Farmatsevtika mahsulotlari – Texnik jihatdan tartibga solish sohasidagi normativ hujjatlar talablariga muvofiqligi tasdiqlanishi majburiy bo‘lgan mahsulot hisoblangani bois, qonunchilikda o‘rnatilgan tartibda akkreditatsiya qilingan, farmatsevtika mahsulotlarining belgilangan talablarga muvofiqligini tasdiqlashga oid faoliyatni amalga oshiruvchi sertifikatlashtirish organlari tomonidan sertifikatlashtiriladi.

Amaldagi tartibga muvofiq, davlat ro‘yxatidan o‘tgan va import qilingan dori vositalarining har bir seriyasi sertifikatlashtirish jarayonidan o‘tadi hamda har bir seriya mahsulotga muvofiqlik sertifikati rasmiylashtiriladi. Sertifikatlashtirilmagan dori vositalarining bojxona hududidan olib chiqilishiga va realizatsiya qilinishiga yo‘l qo‘yilmaydi.

Tibbiy mahsulotlarni sertifikatlashtirish organlari tomonidan 49 956 seriyadagi 1 043 401 555 shartli o‘ramdagi dori vositalari, tibbiy buyumlar va tibbiy texnika uchun muvofiqlik sertifikatlari rasmiylashtirildi. Bunda 788 seriyadagi 58 494 238 shartli o‘ram dori vositalari, tibbiy buyumlar va tibbiy texnikaning nomuvofiqligi aniqlanib, ushbu mahsulotlarga muvofiqlik sertifikatlari rasmiylashtirish rad etildi.

Ta’kidlash joiz, o‘rnatilgan tartibga muvofiq, O‘zbekiston Respublikasi hududiga olib kiriladigan dori vositalarining va tibbiy buyumlarni sertifikatlashtirish sinovlari natijasida qo‘llash uchun yaroqsizligi aniqlangan bo‘lsa, bunday dori vositalari va tibbiy buyumlar O‘zbekiston Respublikasi bojxona qonunchiligida belgilangan tartibda O‘zbekiston Respublikasi hududidan tashqariga chiqarib yuboriladi (reeksport) yoki bojxona rejimida joylashtiriladi va yo‘q qilinadi.

Dori vositalari, tibbiy buyumlar va tibbiy texnikalar uchun berilgan muvofiqlik sertifikatlari haqida Farmatsevtika mahsulotlari xavfsizligi markazining rasmiy veb sayti (Yagona axborot tizimi)dan ma’lumot olish mumkin.

Mohigul Qosimova, O‘zA