Эквадор президентлигига номзод Фернандо Вильявисенсьо мамлакат пойтахти Китодаги сайловолди митингидан сўнг ўлдирилди, деб ёзади El Universo.
“Президентликка номзод Фернандо Вильявисенсьо Валенсия чоршанба куни Китодаги митингдан сўнг бошига 3 марта ўқ узилиши оқибатида ҳалок бўлди”, – дейилади хабарда.
Сиёсатчининг ўлимини унинг дўсти, шунингдек, президент Гильермо Лассонинг ўзи ҳам тасдиқлаган.
Газетанинг ёзишича, яна саккиз киши жароҳат олган. Улардан етти нафари касалхонага ётқизилган.
Прокуратуранинг аниқлик киритишича, ҳужумда гумонланувчи ўқдан олган жароҳатларидан вафот этган.
Сўнгги сўровларга кўра, Вильявисенсьо президентлик учун курашда ғалаба қозониш учун етарли овоз тўплай олмаган.
Эслатиб ўтамиз, Эквадорда Президентлик сайлови жорий йилнинг 20 август куни бўлиб ўтиши режалаштирилган.
ЎзА