Футбол бўйича қишки трансферлар ойнасининг асосий қаҳрамонларидан бирига айланган Ўзбекистон миллий терма жамоаси аъзоси Абдуқодир Ҳусанов қайси жамоага ўтиши, ўзбек ўғлони учун курашаётган жамоалар сони ортаётгани ҳақида деярли ҳар тонг янги хабарлар чиқмоқда.
2023 йилнинг ёзида Абдуқодир Ҳусановни Беларуснинг “Энергетик-БГУ” жамоасидан 100 минг еврога сотиб олган “Ланс” жамоаси футболчимизни 25-30 миллион еврога сотиб юборишни умид қилаётган эди. Франция футболини ёритиб келаётган манбалардан бири foot-sur7.fr сайти “Ланс” ўз кашфиётига бўлаётган қизиқишнинг ортиб бориши ортидан 20 ёшли ҳимоячимизнинг трансферидан 40 миллион евро ишлаб олишга умид қилаётгани ҳақида хабар тарқатди.
Аслида, Абдуқодир Ҳусановнинг “Ланс” билан амалдаги шартномаси 2027 йилнинг 30 июнигача тузилган. Лекин “Ланс” ўз марказий ҳимоячисини қўйиб юборишга тайёрлигини билдирганидан кейин харидор клублар сони кўпайиб кетди. Ҳозирда футболчимизни харид қилишда “Реал” ва “ПСЖ” жамоаларидан кўра, Англиянинг “Ньюкасл” ва “Манчестер Сити” клубларининг уриниши анча жиддий даражага кўтарилди. Натижада ушбу жамоалар раҳбарияти марказий ҳимоячимизнинг агентлари, хусусан отаси Ҳикматжон Ҳошимов билан учрашув ўтказишга улгурди.
Ҳаттоки, “Манчестер Сити” клуби Абдуқодир Ҳусанов учун “Ланс”га 36 миллион евро бериш таклифини ўз олдига мақсад қилиб қўйганини ошкор қилди. Манчестерликлардан ташқари Мадриднинг “Реал” клуби ҳам футболчимиз билан фаол алоқада бўлиб турибди, аммо бу жамоа футболчимиз учун аниқ нарх таклиф қилмаган.
Шунингдек, Абдуқодирга Италия ва Германия футболининг грандлари ҳам назар ташламоқда. Жумладан, “Наполи”, “Аталанта”, “Ювентус”, Германиянинг амалдаги чемпиони “Байер Леверкузен” ва “Боруссия Дортмунд” жиддий қизиқиш билдираётгани ҳақида маълумотлар тарқатилмоқда.
Шуни таъкидлаб ўтишимиз лозимки, Абдуқодир Ҳусанов қанчалик номдор жамоалар ўртасида талаш бўлмасин, янги жамоа сафида мунтазам ўйин амалиётига эга бўлиши лозим. Буни ҳатто трансферлар бўйича экспертлар ҳам таъкидламоқда. Улар футболчимизнинг ёшлигини инобатга олиб, “Манчестер Сити” ва “Реал” каби гранд клубларга ўтишдан олдин навқирон ўйинчилар билан ишлашда ўзига хос тизим яратган жамоаларда ўйнаб, даражасини янада кўтаришни маслаҳат беришмоқда. Бу борада эса Бундеслига ва АПЛ клублари катта тажрибага эга экани барчага маълум.
Маълумот ўрнида: 20 ёшли футболчимиз 2024-2025 йилги мавсумнинг барча турнирларидаги дастлабки 16 та учрашувида жами 1219 дақиқа ҳаракат қилди ва ҳимоядаги вазифаларини бажаришдан ташқари, битта голли узатма ҳам қайд этди. “Calciomercato.com” порталининг маълум қилишича, Абдуқодир Ҳусанов ҳаводаги яккакурашларда ғолиб чиқиш ҳамда ҳимоя ҳаракатларини амалга оширишда 80 фоизлик кўрсаткич қайд этган Европадаги ягона марказий ҳимоячи ҳисобланади.
Жавоҳир Тошхўжаев,
ЎзА