Futbol bo‘yicha qishki transferlar oynasining asosiy qahramonlaridan biriga aylangan O‘zbekiston milliy terma jamoasi a’zosi Abduqodir Husanov qaysi jamoaga o‘tishi, o‘zbek o‘g‘loni uchun kurashayotgan jamoalar soni ortayotgani haqida deyarli har tong yangi xabarlar chiqmoqda.
2023 yilning yozida Abduqodir Husanovni Belarusning “Energetik-BGU” jamoasidan 100 ming yevroga sotib olgan “Lans” jamoasi futbolchimizni 25-30 million yevroga sotib yuborishni umid qilayotgan edi. Fransiya futbolini yoritib kelayotgan manbalardan biri foot-sur7.fr sayti “Lans” o‘z kashfiyotiga bo‘layotgan qiziqishning ortib borishi ortidan 20 yoshli himoyachimizning transferidan 40 million yevro ishlab olishga umid qilayotgani haqida xabar tarqatdi.
Aslida, Abduqodir Husanovning “Lans” bilan amaldagi shartnomasi 2027 yilning 30 iyunigacha tuzilgan. Lekin “Lans” o‘z markaziy himoyachisini qo‘yib yuborishga tayyorligini bildirganidan keyin xaridor klublar soni ko‘payib ketdi. Hozirda futbolchimizni xarid qilishda “Real” va “PSJ” jamoalaridan ko‘ra, Angliyaning “Nyukasl” va “Manchester Siti” klublarining urinishi ancha jiddiy darajaga ko‘tarildi. Natijada ushbu jamoalar rahbariyati markaziy himoyachimizning agentlari, xususan otasi Hikmatjon Hoshimov bilan uchrashuv o‘tkazishga ulgurdi.
Hattoki, “Manchester Siti” klubi Abduqodir Husanov uchun “Lans”ga 36 million yevro berish taklifini o‘z oldiga maqsad qilib qo‘yganini oshkor qildi. Manchesterliklardan tashqari Madridning “Real” klubi ham futbolchimiz bilan faol aloqada bo‘lib turibdi, ammo bu jamoa futbolchimiz uchun aniq narx taklif qilmagan.
Shuningdek, Abduqodirga Italiya va Germaniya futbolining grandlari ham nazar tashlamoqda. Jumladan, “Napoli”, “Atalanta”, “Yuventus”, Germaniyaning amaldagi chempioni “Bayer Leverkuzen” va “Borussiya Dortmund” jiddiy qiziqish bildirayotgani haqida ma’lumotlar tarqatilmoqda.
Shuni ta’kidlab o‘tishimiz lozimki, Abduqodir Husanov qanchalik nomdor jamoalar o‘rtasida talash bo‘lmasin, yangi jamoa safida muntazam o‘yin amaliyotiga ega bo‘lishi lozim. Buni hatto transferlar bo‘yicha ekspertlar ham ta’kidlamoqda. Ular futbolchimizning yoshligini inobatga olib, “Manchester Siti” va “Real” kabi grand klublarga o‘tishdan oldin navqiron o‘yinchilar bilan ishlashda o‘ziga xos tizim yaratgan jamoalarda o‘ynab, darajasini yanada ko‘tarishni maslahat berishmoqda. Bu borada esa Bundesliga va APL klublari katta tajribaga ega ekani barchaga ma’lum.
Ma’lumot o‘rnida: 20 yoshli futbolchimiz 2024-2025 yilgi mavsumning barcha turnirlaridagi dastlabki 16 ta uchrashuvida jami 1219 daqiqa harakat qildi va himoyadagi vazifalarini bajarishdan tashqari, bitta golli uzatma ham qayd etdi. “Calciomercato.com” portalining ma’lum qilishicha, Abduqodir Husanov havodagi yakkakurashlarda g‘olib chiqish hamda himoya harakatlarini amalga oshirishda 80 foizlik ko‘rsatkich qayd etgan Yevropadagi yagona markaziy himoyachi hisoblanadi.
Javohir Toshxo‘jayev,
O‘zA