Россия билан Ўзбекистон ўртасида сайёҳлик оқими жорий йилда пандемиядан аввалги давр натижаларини ортда қолдиради, деб маълум қилмоқда Россия иқтисодий ривожланиш вазирлиги.
«Россияликлар учун Ўзбекистонга бориш қулай. РФ дан келадиган меҳмонларнинг сони баҳордан буён барқарор ортиб бормоқда. Сайёҳлик оқими 2019 йилги кўрсаткичлардан ошишини кутяпмиз», — деди Россия иқтисодий ривожланиш вазири Максим Решетников.
Унинг аниқлик киритишича, йилнинг биринчи ярмида республикага 126 минг россиялик келиб кетган.
«Ўзбекистон давлат статистика қўмитасининг маълумотига кўра, бу ўтган йилнинг шу даврига нисбатан икки баробарга кўп», — деди у.
Решетниковнинг қўшимча қилишича, икки мамлакат сайёҳлик оқимини кўпайтириш учун қўшма тадбирлар ўтказиш режасини тасдиқлашган. Ҳужжат туристик маҳсулотларни илгари суриш ва транспорт логистикасини такомиллаштиришга қаратилган йигирмага яқин турли тадбирларни ўз ичига олади.