Qozog‘iston Respublikasi Bosh vazirining birinchi o‘rinbosari, Ikki tomonlama hamkorlik bo‘yicha hukumatlararo qo‘shma komissiya hamraisi Asqar MAMIN davlatimiz rahbari bilan muloqotdan so‘ng O‘zA muxbiriga quyidagilarni so‘zlab berdi:

– O‘zbekiston Prezidenti Shavkat Mirziyoyev bilan uchrashuvimiz g‘oyat samarali kechdi. Muloqot davomida mamlakatlarimiz o‘rtasidagi siyosiy, savdo-iqtisodiy, madaniy-gumanitar sohalardagi keng ko‘lamli munosabatlarni rivojlantirish masalalari yuzasidan fikr almashdik.

Qozog‘istonda 2018-yil – O‘zbekiston yili deb e’lon qilingani munosabati bilan belgilangan barcha tadbirlar ko‘tarinki ruhda o‘tkazilmoqda. Bu mamlakatlarimizning do‘stona aloqalari rivojiga yangi ruh bag‘ishlamoqda.

O‘zbekistonning Markaziy Osiyo mintaqasida hamkorlikni mustahkamlash borasidagi amaliy qadamlari barcha davlatlarga o‘rnak bo‘lmoqda.