Fransiyaning Montagne et Neige Développement kompaniyasi “Beldersoy – Chimyon – Nanay” xalqaro umummavsumiy kurortini qurish va undan foydalanish bo‘yicha o‘tkazilgan tanlovda g‘olib bo‘ldi.
Investitsiyalar, sanoat va savdo vazirligi matbuot xizmati bergan xabarga ko‘ra, “Chimyon turistik zonasini qurish” loyihasi doirasida “Chimyon” umummavsumiy oromgohi ob’ektlarini loyihalash, tadqiq qilish, qurish, jihozlarni yetkazib berish va o‘rnatish, sozlashishga tushirish ishlarini olib borish yuzasidan 1-6-sonli lotlar bo‘yicha ochiq tanlov yakuniga yetkazildi.
Tanlov natijalariga ko‘ra Fransiyaning Montagne et Neige Développement (MND) kompaniyasi g‘olib deb topildi. Ma’lumot o‘rnida aytish kerak, MND tog‘li hududlarda loyihalarni amalga oshirish bo‘yicha yetakchi sanoat guruhlaridan biridir. Bosh qarorgohi Fransiya janubidagi Savoya departamentining Sen-Helene-dyu-Lak shahrida joylashgan. Guruh 2004 yildan buyon dunyoning 49 davlatida faoliyat yuritib kelmoqda.
MND tog‘li joylarda turizm sohasida umummavsumiy loyihalarni amalga oshirish hamda osma yo‘llaridan shaharlarda, sanoat ob’ektlarida va maishiy maqsadlarda foydalanish bo‘yicha keng ko‘lamli xizmatlar ko‘rsatishda jahon yetakchilaridan biri hisoblanadi. Bundan tashqari, kompaniya Kurchevel, Chamonix-Mon-Blanc, Rosa Xutor, Bosco Gurin, Moleson, Narvik va boshqalar kabi butun dunyo bo‘ylab 1500 dan ortiq loyihalarni amalga oshirishda ishtirok etgan.
Chimyondagi loyihani amalga oshirish natijasida mamlakatimiz aholisiga ham, xorijlik mehmonlarga ham ochiq havoda hordiq chiqarishning har xil turlarini taklif etadigan xalqaro darajadagi umummavsumiy majmuasi tashkil etiladi.
Loyiha doirasida dam oluvchilarni 2515 metr balandlikka ko‘tariladigan gondol tipidagi 10 kishilik asosiy osma yo‘li va 3309 metr balandlikka chiqadigan mayatnik tipidagi 80 kishilik oraliq osma yo‘li quriladi. Kurort bunday inshootlarga ega bo‘lgan Markaziy Osiyo mamlakatlaridagi eng baland nuqtaga aylanadi.
Shuningdek, unda XXL Zip line, Alpine coaster, Adventure tower, Tubing, Via ferrata kabi 20 dan ortiq turdagi qishki va yozgi attraksionlar tashkil etiladi. Umumiy uzunligi 20 km dan ortiq bo‘lgan turli darajadagi 11 ta chang‘i uchish joylari, 6000 nafar turistga mo‘ljallangan mehmonxona majmualari va kottejlar quriladi.
Ushbu yirik tashabbusdan ko‘zlangan maqsad xalqaro miqyosdagi umummavsumiy kurort, sayyohlik joylari va turli ko‘ngilochar attraksionlar hamda osma yo‘llarga ega yangi turistik majmualarni qurish orqali hududning investitsiyaviy jozibadorligini yuksaltirishdir.
Shuningdek, Toshkent viloyatining turizm infratuzilmasini rivojlantirish, mamlakatimizning tog‘li hududlarida ommaviy sportni rag‘batlantirish uchun shart-sharoitlar yaratish va yangi ish o‘rinlari tashkil qilishdan iborat.
Mehmonxona majmualari va kottejlarni qurishni tashkil qilish yer uchastkalarini turli lotlarga bo‘lish (tasdiqlangan dizayn-kodi bilan) va yaqin kelajakda qiziqqan investorlarga sotish uchun “E-IJRO AUKSION” elektron savdo maydonchasida joylashtirish orqali amalga oshirish ko‘zda tutilgan.
Go‘zal Sattorova,
O‘zA