Нөкисте республикамыздағы балалар ҳәм жас өспиримлер спорт мектеплеринде тәрбияланып атырған 2010-жыллары туўылған жас өспиримлер арасында спорттың футбол түри бойынша Қарақалпақстан Республикасы чемпионаты өткерилип, оған 18 команда қатнасты.
Чемпионаттың финаль басқышында Хожели ҳәм Тақыятас районының командалары өз-ара беллесип, ойын жуўмағында Хожели районының командасы биринши, Тақыятас районының командасы екинши, Шоманай районы ҳәм Нөкис қаласы командасы үшинши орынды ийеледи.
– Чемпионатты өткериўдеги тийкарғы мақсет – елимизде жас өспиримлер арасында футбол спорт түрин раўажландырыў ҳәм саламат турмыс тәризин қәлиплестириў, Қарақалпақстан сайланды командасы қурамына ҳәм Қарақалпақстан Республикасы балалар ҳәм жас өспиримлер футбол шеберлиги мектебине қәбилетли оқыўшыларды сайлап алыўдан ибарат, – дейди Қарақалпақстан футбол ассоциациясының қәнигеси Д.Аманбаев.
Жеңимпазлар шөлкемлестириўшилер тәрепинен мүнәсип сыйлықланды.
Қарақалпақстан хабар агентлиги