Тақыятас районындағы 3-санлы улыўма орта билим бериў мектеби райондағы ең көп оқыўшы билим алатуғын билимлендириў орны болып есапланады. Бүгинги күни мектепте 1800 ден аслам оқыўшы оқып билим алмақта. Бирақ, район орайында халық санының өсип барыўы нәтийжесинде мектепте оқыўшылар саны да көбейип, мектепке қосымша оқыў имараты зәрүрлиги пайда болған еди.
Өзбекстан Республикасы Президентиниң 2022-жыл 22-январьдағы «2022-2024-жылларда Өзбекстан Республикасының социаллық ҳәм өндирислик инфраструктурасын раўажландырыў илажлары ҳаққында»ғы 98-санлы қарары тийкарында 3-санлы улыўма орта билим бериў мектебинде капитал реконструкция жумыслары есабынан 4 млрд. 973,7 млн. сумлық 540 орынлық қосымша мектеп имараты қурып питкерилди.
Имараттың ашылыў мәресимине тараў басшылары, райондағы сектор баслықлары, мектеп жәмәәти ҳәм кең жәмийетшилик ўәкиллери қатнасты.
Онда район ҳәкими ўазыйпасын атқарыўшы А.Аманов, Қарақалпақстан Республикасы Жоқарғы Кеңесиниң комитет баслығы Ш.Өтемисов ҳәм аймақ нураныйлары шығып сөйлеп, илаж қатнасыўшыларын жаңа имараттың қурып питкерилиўи менен қутлықлады ҳәм усы мектеп имаратының халқымыздың ийгилиги жолында хызмет ететуғынлығына исеним билдирди.
Буннан соң имарат алдына тартылған дәстүрий лента кесилип, илаж қатнасыўшылары мектептиң ишки имканиятлары менен жақыннан танысты.
Мағлыўмат ушын айтып өтиўимиз керек, 4 млрд. 973,7 млн. сумлық 540 орынлық қосымша мектеп имараты «MAX ELIT STORY» жуўапкершилиги шекленген жәмийети тәрепинен қурып питкерилди.
Мектеп имаратына қосымша ретинде жазғы спорт майданшасы, яғный, жасалма қапламалы киши футбол майданшасы қурып берилди.
Адилбай Оразов,
Қарақалпақстан хабар агентлиги шолыўшысы