Ташкент қаласында экономикалық бирге ислесиў бойынша Өзбекстан-Венгрия ҳүкиметлараралық комиссиясының жәрдемши баслықлары, Өзбекстан Бас министриниң орынбасары – Инвестициялар ҳәм сыртқы саўда министри Сардар Умурзақов ҳәм Венгрия сыртқы ислер ҳәм сыртқы экономикалық байланыслар министри Петер Сийярто арасында ушырасыў болып өтти.
Жоқары дәрежедеги илажда сиясий, инвестициялық, саўда-экономикалық, қаржы-техникалық, транспорт-логистика, мәдений-гуманитарлық ҳәм аймақлараралық тараўлардағы еки тәреплеме бирге ислесиў мәселелери, әмелдеги келисимлердиң турмысқа енгизилиўи және тийкарғы бағдарларда қатнасықларды тереңлестириў перспективасы додаланды.
Тәреплер уйымлараралық дәрежедеги бирге ислесиўди избе-из ҳәм системалы раўажландырыў, сондай-ақ, еки мәмлекет исбилермен топарларының ўәкиллери арасындағы тиккелей байланысты беккемлеў бойынша алып барылып атырған нәтийжели жумысларды айрықша атап өтти.
Тоқымашылық, азық-аўқат, фармацевтика ҳәм химия өнимлерин өз-ара жеткерип бериў көлеми артқан. Инвестициялық бирге ислесиў де кеңейип бармақтаҮ венгер компаниялары ҳәм банклери Өзбекстанда жойбарларды табыслы әмелге асырмақта ҳәм шерикликти кеңейтиў ушын жаңа бағдарлар излеп атыр.
Фармацевтика тараўындағы қатнасықлардың жақынлыққа тийкарланғаны атап өтилди. Соның ишинде, Өзбекстанда дәри-дәрмақ ислеп шығарыў бойынша жаңа қоспа кәрханалар шөлкемлестириў, ислеп шығарылып атырған өнимлерди дизимге алыў жумыслары жедел алып барылмақта. Венгрия жетекши фармацевтика компанияларының басшыларынан ибарат делегациясының инвестициялық бирге ислесиўдиң жаңа бағдарларын ислеп шығыў мақсетинде Өзбекстанға сапарын шөлкемлестириўге келисип алынды.
Тәреплер транспорт тараўындағы бирге ислесиўди раўажландырыў, соның ишинде, билимлендириў тараўындағы байланысларды кеңейтиў мәселелерине айрықша итибар қаратылды. Сондай-ақ, илим ҳәм инновациялар тараўындағы байланысларды жеделлестириў ҳаққында келисимге ерисилди.
Ушырасыў жуўмағында еки мәмлекет делегациялары басшылары бирге ислесиўди кеңейтиў бойынша қосымша усыныслар алмасты. Жойбар ҳәм басламаларды әмелге асырыўға қаратылған сөйлесиўди раўажландырыўға келисип алынды.
ӨзА