ӨзА “Сыртқы дипломатия” рубрикасы арқалы мәмлекетимиздиң сырт мәмлекетлердеги елшиханалары ҳәм консуллық орайларының жумысы менен жақыннан таныстырыў, елшилеримиз тәрепинен экономикалық дипломатияны раўажландырыў жолында алып барылып атырған жумысларды таллаўда даўам етеди.
Люксембург. Өзбекстан елшиси Ғайрат Фозилов (резиденциясы Брюссель қаласында) Люксембург Мийрасхор Уллы Герцоги Гийом (Вильгельм)ға исеним жарлықларын тапсырды.
Мәресим шеңберинде болып өткен сәўбетте Мийрасхор Уллы Герцог Өзбекстан менен қатнасықларды раўажландырыўдан мәпдар екенин билдирди. Сәўбет даўамында, сондай-ақ, еки тәреплеме қатнасықларды раўажландырыў перспективалары толық додаланды.
Япония. Токиодағы елшимиз Муҳсинхўжа Абдураҳмонов Канагава префектурасы губернаторы Южи Куроива менен еки тәреплеме ушырасыў өткерди.
Сөйлесиў даўамында Канагава префектурасы менен мәмлекетимиз аймақлары арасында саўда-экономикалық, инвестициялық, билимлендириў, мәденият ҳәм туризм тараўларында бирге ислесиўди раўажландырыў мәселелери додаланды.
Ҳиндстан. Делидеги елшимиз Сардор Рустамбоев Мумбай қаласында Маҳараштра штаты губернаторы Чандрапурам Радҳакришнан менен ушырасып, Өзбекстан ҳәм Ҳиндстан арасындағы кең көлемли, соның ишинде, аймақлараралық бирге ислесиўдиң бүгинги жағдайы, Маҳараштра штаты менен экономика, саўда-санаат, аўыл хожалығы, туризм, медицина, илим ҳәм билимлендириў ҳәм басқа тараўларда перспективалы жойбарларды әмелге асырыў мәселелери бойынша толық пикир алысты.
Дипломат сондай-ақ, Ҳиндстанның ири зергерлик кәрханаларынан бири болып есапланатуғын “Gold Star Jewellery” компаниясының директоры Ашиш Шоҳ пенен Өзбекстан ҳәм усы компания арасында зергерлик буйымларын ислеп шығарыў бойынша перспективалы биргеликтеги жойбарларды әмелге асырыў мәселесин де додалады.
Венгрия. Жақында Будапешттеги елшимиз Ойбек Шахавдинов Венгрия Бас министриниң миллий қәўипсизлик бойынша бас мәсләҳәтшиси уйымының стратегиялық мәселелер бойынша директоры Мартон Шёберл, халықаралық мәселелер бойынша мәсләҳәтшиси Дюла Сомоджи ҳәм стратегиялық мәселелер бойынша мәсләҳәтшиси Питер Вагнер менен сөйлесиўлер өткерди.
Ушырасыў даўамында тийкарғы итибар қәўипсизлик тараўындағы еки тәреплеме қатнасықларды тереңлестириўге қаратылды. Тәреплер миллий ҳәм халықаралық қәўипсизлик мәселелери бойынша биргеликтеги жумысларды және де раўажландырыўдан мәпдар екенин билдирди.
Муҳаррама Пирматова таярлады. ӨзА