ÓzA “Sırtqı diplomatiya” rubrikası arqalı mámleketimizdiń sırt mámleketlerdegi elshixanaları hám konsullıq oraylarınıń jumısı menen jaqınnan tanıstırıw, elshilerimiz tárepinen ekonomikalıq diplomatiyanı rawajlandırıw jolında alıp barılıp atırǵan jumıslardı tallawda dawam etedi.
Lyuksemburg. Ózbekstan elshisi Ǵayrat Fozilov (rezidenciyası Bryussel qalasında) Lyuksemburg Miyrasxor Ullı Gercogi Giyom (Vilgelm)ǵa isenim jarlıqların tapsırdı.
Máresim sheńberinde bolıp ótken sáwbette Miyrasxor Ullı Gercog Ózbekstan menen qatnasıqlardı rawajlandırıwdan mápdar ekenin bildirdi. Sáwbet dawamında, sonday-aq, eki tárepleme qatnasıqlardı rawajlandırıw perspektivaları tolıq dodalandı.
Yaponiya. Tokiodaǵı elshimiz Muhsinxwja Abdurahmonov Kanagava prefekturası gubernatorı Yuji Kuroiva menen eki tárepleme ushırasıw ótkerdi.
Sóylesiw dawamında Kanagava prefekturası menen mámleketimiz aymaqları arasında sawda-ekonomikalıq, investiciyalıq, bilimlendiriw, mádeniyat hám turizm tarawlarında birge islesiwdi rawajlandırıw máseleleri dodalandı.
Hindstan. Delidegi elshimiz Sardor Rustamboev Mumbay qalasında Maharashtra shtatı gubernatorı Chandrapuram Radhakrishnan menen ushırasıp, Ózbekstan hám Hindstan arasındaǵı keń kólemli, sonıń ishinde, aymaqlararalıq birge islesiwdiń búgingi jaǵdayı, Maharashtra shtatı menen ekonomika, sawda-sanaat, awıl xojalıǵı, turizm, medicina, ilim hám bilimlendiriw hám basqa tarawlarda perspektivalı joybarlardı ámelge asırıw máseleleri boyınsha tolıq pikir alıstı.
Diplomat sonday-aq, Hindstannıń iri zergerlik kárxanalarınan biri bolıp esaplanatuǵın “Gold Star Jewellery” kompaniyasınıń direktorı Ashish Shoh penen Ózbekstan hám usı kompaniya arasında zergerlik buyımların islep shıǵarıw boyınsha perspektivalı birgeliktegi joybarlardı ámelge asırıw máselesin de dodaladı.
Vengriya. Jaqında Budapeshttegi elshimiz Oybek Shaxavdinov Vengriya Bas ministriniń milliy qáwipsizlik boyınsha bas másláhátshisi uyımınıń strategiyalıq máseleler boyınsha direktorı Marton Shyoberl, xalıqaralıq máseleler boyınsha másláhátshisi Dyula Somodji hám strategiyalıq máseleler boyınsha másláhátshisi Piter Vagner menen sóylesiwler ótkerdi.
Ushırasıw dawamında tiykarǵı itibar qáwipsizlik tarawındaǵı eki tárepleme qatnasıqlardı tereńlestiriwge qaratıldı. Tárepler milliy hám xalıqaralıq qáwipsizlik máseleleri boyınsha birgeliktegi jumıslardı jáne de rawajlandırıwdan mápdar ekenin bildirdi.
Muharrama Pirmatova tayarladı. ÓzA