Сырт мәмлекетлердиң жетекшилеринен Өзбекстан Республикасы Президенти Шавкат Мирзиёевқа оның усы жылы 24-октябрь күни болып өткен сайлаўда мәмлекет басшысы лаўазымына қайта сайланғаны мүнәсибети менен қутлықлаўлар келмекте. Оларда Өзбекстан Президентине жаңа табыслар, мәмлекетимиз халқына болса тынышлық-парахатшылық, абаданлық ҳәм раўажланыў тилеклери билдирилген.
Өзбекстан Республикасы Президенти
Уллы Мәртебели Мырза Шавкат Мирзиёевқа
Ҳүрметли Шавкат Миромонович!
Өзбекстан Республикасы Президенти лаўазымына қайта сайланғаныңыз мүнәсибети менен қызғын қутлықлаўымды қабыл еткейсиз.
Бул жеңис Сизиң ишки ҳәм экономикалық сиясаттағы реформаларыңыздың нәтийжеси болып есапланады. Бул Сизиң миллий мәмлекетшиликти беккемлеў, халықтың абаданлығын арттырыў бағдарындағы басламаларыңыз ҳәм миллий мәплерди регионаллық ҳәм халықаралық майданда алға қойыў бойынша позицияңыз Өзбекстан пуқаралары тәрепинен қоллап-қуўатланып атырғанының көриниси болып есапланады.
Мәмлекетиңиз Сизиң басшылығыңыз астында буннан былай да жедел раўажланыўын тилеймен.
Қазақстан менен Өзбекстан көп әсирлик өз-ара ҳүрмет ҳәм жақсы қоңсышылық дәстүрлерине тийкарланған ҳәр тәреплеме стратегиялық шерикликти беккемлеп барыўға ҳәм халықларымыздың абаданлығы жолында избе-из раўажланатуғынына исенемен.
Өз-ара ҳүрмет ҳәм аңласыўға тийкарланған дослығымызды жоқары қәдирлеймен. Келешекте халықларымыздың абаданлығы жолында және бир мәрте ушырасатуғынымызға үмит етемен.
Пурсаттан пайдаланып, ҳүрметли Шавкат Миромонович, Сизге беккем денсаўлық ҳәм таўсылмас күш-ғайрат, шаңарағыңызға бахыт-ығбал, туўысқан Өзбекстан халқына болса тынышлық-парахатшылық ҳәм раўажланыў тилеймен
Жақсы тилеклер менен
Нурсултан Назарбаев,
Қазақстан Республикасының
Биринши Президенти – Елбасы
* * *
Өзбекстан Республикасы Президенти
Уллы Мәртебели Мырза Шавкат Мирзиёевқа
Ҳүрметли Шавкат Миромонович!
Өзбекстан Республикасында өткен Президент сайлаўындағы жеңисиңиз мүнәсибети менен қызғын қутлықлаўларымды қабыл еткейсиз.
Даўыс бериў нәтийжелери Сизиң мәмлекеттиң раўажланыўын тәмийинлеў, оның халықаралық майдандағы абырайын избе-из арттырыў ҳәм дос өзбек халқының абаданлығын арттырыўға қаратылған әдил сиясатыңыз улыўмахалықлық көлемде қоллап-қуўатланып атырғанынан дәрек береди.
Исенимим кәмил, Түркменстан менен Өзбекстан арасындағы жақсы қоңсышылық, дослық ҳәм жақсы қатнасықлар буннан былай да халықларымыздың айдын келешеги жолында жедел раўажланыўда даўам етеди.
Усы қолайлы пурсаттан пайдаланып, Сизге, ҳүрметли Шавкат Миромонович беккем денсаўлық, бахыт-ығбал, мәмлекет басшысы лаўазымындағы жуўапкершиликли жумысыңызға табыслар, дос Өзбекстан халқына болса тынышлық-парахатшылық ҳәм раўажланыў тилеймен.
Терең ҳүрмет пенен
Гурбангули Бердимуҳамедов
Түркменстан Президенти
* * *
Өзбекстан Республикасы Президенти
Уллы Мәртебели Мырза Шавкат Мирзиёевқа
Сизди Өзбекстан Республикасы Президенти лаўазымына үлкен исеним менен қайта сайланғаныңыз бенен қызғын қутлықлайман.
Улыўма миллий даўыс бериў нәтийжелери бойынша ерисилген ҳақыйқый жеңисиңиз Сизиң Жаңа Өзбекстанды – социаллық-экономикалық турмыстағы үлкен жетискенликлерге ерискен, социаллық-экономикалық жақтан турақлы раўажланып атырған, халықаралық майданда жоқары абырай-мәртебеге ийе мәмлекетти қурыў идеясын әмелге асырыўға қаратылған стратегиялық ҳәрекетлериңиз улыўмахалықлық дәрежеде қоллап-қуўатланып атырғанынан дәрек береди.
Қазақстанда Сизди туўысқан халықларымыз арасындағы бирге ислесиўди избе-из раўажландырыў, дослық ҳәм жақсы қоңсышылықты беккемлеўдиң исенимли тәрепдары сыпатында биледи ҳәм ҳүрмет етеди.
Биргеликтеги ҳәрекетлер менен еки тәреплеме стратегиялық шериклигимизди мәмлекетлеримиз ҳәм пүткил Орайлық Азияның мәплери жолында жоқары дәрежеге алып шығыўға исенимим кәмил.
Күн тәртибиндеги барлық әҳмийетли мәселелерди додалаў ушын Сизди жақын ўақытта Қазақстан Республикасына мәмлекетлик сапар менен келиўге мирәт етемен.
Пурсаттан пайдаланып, ҳүрметли Шавкат Миромонович, Сизге Ўатан ҳәм халық хызметиндеги пидәкерли жумысыңызға жаңа табыслар тилеймен.
Ҳүрмет пенен
Қасым-Жомарт Тоқаев,
Қазақстан Республикасы Президенти
* * *
Өзбекстан Республикасы Президенти
Уллы Мәртебели Мырза Шавкат Мирзиёевқа
Қәдирли Шавкат Миромонович!
Өзбекстан Республикасы Президенти сыяқлы жоқары лаўазымға қайта сайланғаныңыз мүнәсибети менен Сизге қызғын қутлықлаўларым ҳәм жақсы тилеклеримди жоллаў маған үлкен қанаатланыўшылық бағышлайды.
Сизге беккем денсаўлық, абаданлық, дос Өзбекстанның турақлы раўажланыўы жолындағы жумысыңыз буннан былай да нәтийжели болыўын, дос өзбек халқына болса тынышлық-парахатшылық, турақлылық ҳәм раўажланыў тилеймен.
Президент сайлаўындағы исенимли жеңисиңиз Сизиң мәмлекетти избе-из раўажландырыў ҳәм халықаралық майдандағы абырайын беккемлеўге қаратылған сиясатыңыз пүткил халық тәрепинен қоллап-қуўатланып атырғанының және бир айқын көриниси болды.
Мәмлекетке басшылығыңыздың гезектеги дәўиринде дос Өзбекстан бул жолда жаңа шеклерге ерисиўине исенемен.
Сизиң Тәжикстан менен Өзбекстан арасындағы дослық, жақсы қоңсышылық ҳәм стратегиялық шериклик түриндеги конструктивлик бирге ислесиўди ҳәр тәреплеме раўажландырыў ҳәм беккемлеў бағдарындағы избе-из умтылысыңызды жоқары баҳалайман.
Биргеликтеги ҳәрекетлер менен Тәжикстан ҳәм Өзбекстанның нәтийжели мәмлекетлераралық бирге ислесиўин буннан былай да халықларымыздың абаданлығы ҳәм пүткил регион мәплери жолында алға қоямыз.
Пурсаттан пайдаланып, мәмлекетлеримиз қатнасықларын жаңа әмелий мазмун менен байытыўға биргеликте ҳәрекет етиўге таяр екенимди билдиремен.
Ҳүрмет пенен
Эмомали Раҳмон,
Тәжикстан Республикасы Президенти
* * *
Өзбекстан Республикасы Президенти
Уллы Мәртебели Мырза Шавкат Мирзиёевқа
Ҳүрметли Шавкат Миромонович!
Қырғыз Республикасының халқы атынан ҳәм жеке өзимниң атымнан Сизди Өзбекстан Республикасы Президенти етип сайланғаныңыз бенен қызғын қутлықлайман.
Сайлаў нәтийжелери Өзбекстанның көп миллетли халқы Сизге жоқары исеним менен қарап атырғанын және бир мәрте айқын көрсетти.
Сизиң әдил ҳәм узақты көре билетуғын басшылығыңыз астында Өзбекстан мәмлекетшиликти раўажландырыўда үлкен табысларға ерисетуғынына исенемен.
Мәмлекетимизде Сизиң Қырғызстан – Өзбекстан қатнасықларын раўажландырыў ҳәм Орайлық Азия халықларының раўажланыўы жолында регионаллық бирге ислесиўди беккемлеўге қосып атырған үлкен үлесиңизди жоқары қәдирлейди.
Бизлер буннан былай да сиясий сөйлесиўди жеделлестириўге, көп әсирлик дослық ҳәм жақсы қоңсышылық дәстүрлерине тийкарланған еки тәреплеме қатнасықларды кеңейтиў ҳәм беккемлеў үстинде биргеликте ислесиўге таярмыз.
Усы қолайлы имканияттан пайдаланып, Сизге, ҳүрметли Шавкат Миромонович, беккем денсаўлық, жуўапкершиликли мәмлекетлик лаўазымдағы жумысыңызға жаңа табыслар, дос Өзбекстан халқына болса тынышлық-парахатшылық, абаданлық ҳәм раўажланыў тилеймен.
Ҳүрмет пенен
Садир Жапаров,
Қырғыз Республикасының Президенти
* * *
Өзбекстан Республикасы Президенти
Уллы Мәртебели Мырза Шавкат Мирзиёевқа
Ҳүрметли Шавкат Миромонович!
Өзбекстан Республикасы Президенти лаўазымына қайта сайланғаныңыз бенен Сизди шын кеўилден қутлықлайман.
Сайлаўдағы исенимли жеңисиңиз – Сизиң мәмлекет абаданлығы жолындағы сиясатыңыз дос өзбек халқы тәрепинен қоллап-қуўатланып атырғаны, ҳақыйқый жетекши сыпатында Сизге үлкен исеним ҳәм ҳүрмет пенен қарап атырғанының айқын көриниси болып есапланады.
Әзербайжан ҳәм Өзбекстанды халықларымыздың бирдей руўхый қәдириятларына тийкарланған дослық қатнасықлары тығыз байланыстырып турады. Қатнасықларымыздың бүгинги дәрежеси, усы беккем тийкарға қурылған өз-ара пайдалы бирге ислесиўимиз күннен-күнге кеңейип атырғаны үлкен қанаатланыўшылық бағышлайды.
Бай миллий-руўхый қәдириятларымыздан күш алып атырған Әзербайжан – Өзбекстан дослығы ҳәм стратегиялық шериклиги дос халықларымыздың ерк-ықрарына муўапық буннан былай да жоқары көтерилип, беккемленип баратуғынына исенемен.
Ҳүрметли Шавкат Миромонович, Сизге беккем денсаўлық, бахыт-ығбал, дос Өзбекстан Республикасының абаданлығы ҳәм раўажланыўы жолында жоқары мәмлекетлик лаўазымдағы жумысыңызға жаңа табыслар тилеймен.
Ҳүрмет пенен
Илҳам Алиев,
Әзербайжан Республикасы Президенти
* * *
Өзбекстан Республикасы Президенти
Уллы Мәртебели Мырза Шавкат Мирзиёевқа
Ҳүрметли Шавкат Миромонович!
Жоқары мәмлекетлик лаўазымға қайта сайланғаныңыз бенен қызғын қутлықлаўымды қабыл еткейсиз.
Исенимли жеңисиңиз жоқары абырай-мәртебеңиз, сайлаўшылардың сизге болған исеними бәлент екениниң айқын ҳәм сөзсиз дәлийли болды. Халық күшли, ғәрезсиз, заманагөй мәмлекет қурыў бағдарында танланған жолға садық екенин тастыйықлады.
Сизиң тәжирийбели басшылығыңызда Өзбекстан Республикасының жедел раўажланыўында, экономикалық потенциалы ҳәм халықаралық майдандағы орнын беккемлеўде даўам етеди.
Жақын ўақытта екеўимиз жеке ушырасып, еки тәреплеме бирге ислесиўдиң ағымдағы ҳәм перспективалы бағдарларын додалап аламыз.
Усы қуўанышлы пурсаттан пайдаланып, Сизге, ҳүрметли Шавкат Миромонович беккем денсаўлық, таўсылмас күш-ғайрат ҳәм Ўатанның абаданлығын гөзлеп мөлшерленген режелериңизге табыслар тилеймен.
Александр Лукашенко,
Беларусь Республикасының Президенти
Қутлықлаўлардың келиўи даўам етпекте.