Нөкис қаласындағы 21-санлы улыўма орта билим бериў мектебинде Халық билимлендириў системасындағы улыўма орта билим бериў мектеплериниң хызметкерлери арасында «Қуўнақ стартлар» спорт жарысының Қарақалпақстан Республикасы басқышы өткерилди.
Спорт жарысы Өзбекстан Республикасы Президентиниң 2020-жыл 30-октябрьдеги «Саламат турмыс тәризин кеңнен үгит-нәсиятлаў ҳәм ғалабалық спортты буннан былай да раўажландырыў илажлары ҳаққында»ғы Пәрманының орынланыўын тәмийинлеў мақсетинде Өзбекстан «Ёшлик» денетәрбия ҳәм спорт жәмийети тәрепинен шөлкемлестирилип, оған барлық қала ҳәм районлардағы улыўма орта билим бериў мектеплериниң жәми 1952 хызметкери қатнасқан болса, финаль басқышына 272 хызметкер жетип келди.
Қызғын беллесиўлерге бай болған жарыс жуўмағында Шымбай районлық халық билимлендириў бөлими биринши, Кегейли районлық халық билимлендириў бөлими екинши, Нөкис районлық халық билимлендириў бөлими үшинши орынды ийеледи.
Жеңимпазлар шөлкемлестириўшилер тәрепинен мүнәсип сыйлықланды.
Т.СЕЙТНАЗАРОВА,
Қарақалпақстан хабар агентлигиниң шолыўшысы