Соңғы жыллары Әмиўдәрья районындағы көплеген шаңарақлар үй қапталы қыйтақ жерлеринен нәтийжели пайдаланыўда көпшиликке өрнек болып келмекте. Олар жазы бойы жетистирген түрли аўыл хожалығы өнимлери менен шаңарағын тәмийинлеп ғана қалмастан, аўысқанын дийқан базарларына шығарып, халқымызды арзан және сапалы өнимлер менен тәмийинлеўге өзлериниң салмақлы үлеслерин қосып келмекте. Итибарлы тәрепи сонда, үй қапталы қыйтақ жерлеринен нәтийжели пайдаланып киятырған шаңарақлардың алдыңғы ис-тәжирийбеси бүгинги күни республикамыз бойлап кеңнен ен жайдырылмақта.
Исбилерменлер ҳәрекети Өзбекстан либерал-демократиялық партиясы Қарақалпақстан Республикалық Кеңесиниң аппарат басшысы, Жоқарғы Кеңестиң депутаты Шарапат Өтемисов, халық депутатлары Әмиўдәрья районындағы 9’zL8D3P депутатлық топарының ағзасы Муқаддас Бекназаровалар райондағы усындай тәжирийбели шаңарақ ийелери менен ушырасып, тәжирийбелери менен ортақласты.
Бүгинги күни райондағы «Таш-яп» аўыл пуқаралар жыйынында 3 мың 242 пуқара 610 шаңарақта тыныш-татыў жасап келмекте. Усы аймақ турғыны Азат Аташов төрт перзенти менен парникте түрли аўыл хожалығы дақылларының ҳәм гүллердиң нәллерин жетистирип келмекте.
Перзентлеринен бири Ағабектиң атап өткениндей, парникте нәл жетистирип киятырғанына он жылдың майданы болды. Усының есабынан бир-еки жеңил автомашина сатып алып, тойлар өткерди. Ҳәр жылы үй қапталы қыйтақ жерлеринен айтарлықтай дәрамат таппақта.
Олардың қоңсысы Разия апа Қучқарованың үй қапталындағы қыйтақ жери келген адамның итибарын өзине тартады. Бул шаңарақ ағзалары да ҳәр жылы түрли нәл жетистириў менен шуғылланып, Манғыт дийқан базарына сатып келмекте. Разия апаның атап өткениндей, ҳәрекетинде болсаң, үйде отырып-ақ, 30-40 миллион сум пул табыўға болады. Буның ушын тынымсыз мийнет етиў керек.
Партия ўәкиллери тәжирийбели шаңарақ ағзалары менен сәўбетлесип, алдағы ўақытлары «Ҳаял-қызлар дәптери»,«Жаслар дәптери»не киргизилген пуқаралардың қатнасында үй қапталы қыйтақ жерлеринен дәрамат алыў бойынша шеберлик сабақларын өткериўге келисип алынды.
Д.АБИБУЛЛАЕВ,
Қарақалпақстан хабар агентлигиниң шолыўшысы.