ИСБИЛЕРМЕНЛИК
Президентимиздиң басламасы менен елимизде ҳаял-қызлардың социаллық-сиясий белсендилигин арттырыў, оларды ҳәр тәреплеме қоллап-қуўатлаў, исбилерменликти раўажландырыўға айрықша итибар қаратылмақта.
Атап айтқанда, «Тадбиркор аёл» исбилермен ҳаял-қызлар ассоциациясы бүгинги күнде елимиз көлеминде ҳаял-қызлар исбилерменлигин раўажландырыў, олардың бәнтлигин тәмийинлеў, ҳуқық ҳәм еркинликлерин қорғаў бойынша бир қатар жойбарларды әмелге асырылмақта. Ассоциация өзиниң Қарақалпақстан Республикасы бөлими менен биргеликте Орайлық Азия регионаллық экономикалық бирге ислесиў бағдарламасының (CAREC) «Раўажланыў нәтийжелилигин арттырыў ушын пуқаралық жәмийетиниң қатнасын тереңлестириў-пуқаралық жәмийетиниң АРБ операцияларындағы қатнасын тереңлестириў» пилот жойбары усылардан бири есапланады.
Орайлық Азия регионаллық экономикалық бирге ислесиў бағдарламасының бир бөлеги есапланған бул биргеликтеги жойбар Азия раўажланыў банкиниң пуқаралық жәмийетин қоллап-қуўатлаў орайы тәрепинен қаржыландырылмақта. Ол аймақлық ҳәм Евроазия базарларына шығатуғын халықаралық автомобиль коридорын ашыў бойынша «Коридор 2. Қарақалпақстан Республикасының автомобиль жолларын раўажландырыў» ири жойбарының компоненти сыпатында әмелге асырылмақта. Қабыл етилген бағдарламаға муўапық, елимизде автомобиль жолларының қурылысы ҳәм оны тиклеўди қоллап-қуўатлаў бойынша жумыс әмелге асырылады, соның ишинде, аўыллық жерлерде жол инфраструктурасын жақсылаў, логистика ҳәм саўда орайларын шөлкемлестириўди қоллап-қуўатлаў, өз гезегинде экономиканың буннан былай да раўажланыўына, саўда-сатық байланысларының кеңейиўине хызмет етеди. CAREC бағдарламасы шеңберинде аймақлық транзит коридорын шөлкемлестириў ушын ҳәм елимиздиң ең тийкарғы халықаралық саўда жолларынан бири болған А-380 жолының Қоңырат-Даўыт ата участкасында модернизация жумыслары алып барылады.
-Бул айрықша әҳмийетке ийе жойбар,-дейди «Тадбиркор аёл» исбилермен ҳаял-қызлар асосциациясы Қарақалпақстан Республикасы бөлими атқарыўшы директоры Назира Елибаева.-Себеби, оның әмелге асырылыўы менен Қоңырат районының орайының Қазақстан менен шегералас аймақлары («Қарақалпақстан» ҳәм «Жаслық» посёлкалық пуқаралар жыйынлары) аралығындағы автомобиль жолларының бойларында саўда ҳәм хызмет көрсетиў инфраструктуралары иске түсириледи. Нәтийжеде бул аймақларда жасаўшы халықтың, әсиресе, ҳаял-қызлар исбилерменлигин раўажландырыў менен бирге, жолаўшыларға үлгили сервис хызметин көрсетиў имканияты жаратылады.
Усы жылдың апрель айында басланған жойбар жылдың ақырына шекем даўам етеди. Онда «Қарақалпақстан» ҳәм «Жаслық» посёлкалық пуқаралар жыйынларының ҳәр биринен 120 жумыссыз ҳаял-қыз ушын исбилерменлик тийкарлары, киши бизнести басқарыў, қаржыландырыў ҳәм үнемлеў, шаңарақ исбилерменлиги, соның ишинде шаңарақлық кәрханалар дүзиў бойынша оқыў семинарлары шөлкемлестириледи. Оларға кредит алыў ушын бизнес-реже дүзиўде әмелий жәрдем берилип, консалтинг хызметлери усынылады. Бул болса, шетки аймақларда жасап атырған ҳаял-қызлардың бәнтлигин тәмийинлеўге, олардың исбилерменлик көнликпелерин қәлиплестириўге, ең баслысы, шаңарақлардың абаданлығын арттырыўға хызмет етеди.
Д.АБИБУЛЛАЕВ,
Қарақалпақстан хабар агентлигиниң шолыўшысы