Мәмлекетлик салық хызмети уйымларының хызметкерлери тәрепинен Нөкис қаласындағы 4-сектор аймағы турғынлары ушын арзанлатылған ярмаркалар шөлкемлестирилди.
Қарақалпақстан Республикасы мәмлекетлик салық басқармасы баспасөз хызметиниң мағлыўматларына қарағанда, усы ярмаркада азық-аўқатлық өнимлери болған картошка, пияз, гешир ҳәм май арзанлатылған баҳаларда сатылды.
Сондай-ақ, сектор аймағындағы кем тәмийинленген шаңарақлардың жағдайларынан хабар алынып, азық-аўқатлық өнимлер тапсырылды.
Карантин ўақтында пуқаралардың өз үйлеринде қалып, шаңарақ ағзалары менен биргеликте ўақыт өткериўи тек ғана өзиниң емес ал, пүткил жәмийет қәўипсизлигине қосқан үлеси болып табылады.
Орынларда 4-сектор басшылары тәрепинен аймақтағы социаллық жәрдемге мүтәж шаңарақлардың ҳал-жағдайынан хабар алыў илажлары даўам етпекте.
Қарақалпақстан хабар агентлиги.