Келеси жылы кириў имтиханларына 5 пәннен тест тапсырылыўы мүмкин. Оған байланыслы жойбар додалаў ушын қойылды. Имтиханда 3 мәжбүрий пәнлерден ҳәм 2 билимлендириў бағдарына сәәйкес пәнлерден тест алынады.
Мәмлекетлик тест орайы келеси жылғы кириў имтиханларында 5 пәннен тест тапсырыўға байланыслы жойбарды додалаў ушын жәриялады. Бул ҳаққында togri.uz сайты хабар бермекте.
Оған бола, тәртип төмендегише болыўы режелестирилмекте:
Мәжбүрий пәнлер:
Ана тили-15 сораў, ҳәр бири ушын 2.1 баллдан;
Математика- 15 сораў, ҳәр бири ушын 2.1 баллдан;
Өзбекстан тарийхы- 15 сораў, ҳәр бири ушын 2.1 баллдан.
Жәми топлаў мүмкин болған балл – 94.5 балл.
Билимлендириў бағдарына сәйкес пәнлер:
1-пән 30 сораў, ҳәр бири ушын 3.1 баллдан;
2-пән 30 сораў, ҳәр бири ушын 3.1 баллдан.
Жәми топлаў мүмкин болған балл – 186 балл.
Мәжбүрий пәнлер бойынша абитуриентлерге берилетуғын сораўлар биринши қурамалылық дәрежесиндеги сораўлар болып (яғный, ең аңсат сораўлар), оларға жуўап ушын – ана тили ҳәм Өзбекстан тарийхы пәнлеринен 1 минутқа шекем, математика пәнинен – 1,5 минутқа шекем ўақыт ажыратылыўы мөлшерленген.
Тест тапсырмаларына жуўап бериў ҳәм жуўапларды жуўаплар қағазына көшириў менен бирге тест сынақларына жәми 3 саат ўақыт ажыратылыўы усыныс етилмекте. Тийкарғы блоктағы 2 пән ушын жәми 2 саат ўақыт бериледи.
Мәмлекетлик тест орайы бул жойбар бойынша пикир-усынысларды @dtmga_murojaat_bot арқалы жибериўди сорамақта.
Қарақалпақстан хабар агентлиги