Пайтахтымыздағы «Жаслар орайы»нда жас әўладты руўхый бәркамал етип тәрбиялаў, олардың бос ўақытларын мазмунлы өткериўди шөлкемлестириў, көркем өнерге, спортқа, мәлимлеме технологияларына, китап оқыўға қызығыўшылығын арттырыў бойынша 5 әҳмийетли басламаны ғалаба үгит-нәсиятлаў, жаслардың хабардарлығын арттырыў мақсетинде Жаслар аўқамы Қарақалпақстан Республикалық Кеңеси тәрепинен «Бес баслама – бес имканият!» сүрени астында акция өткерилди.
Акция шеңберинде, Жаслар орайында «Нөкис мениң көзқарасым менен» темасында сүўретлер таңлаўы өткерилип, таңлаў даўамында жас художник Б.Нуримбетов мастер-класс өткерди. Өзбекстан мәмлекетлик көркем өнер ҳәм мәденият институты Нөкис филиалында болса, тәжирийбели устаз Л.Оразымбетова жас художниклерге шеберлик сабағын өтти.
Екинши басламаға бола, жаслардың дене шынықтырыў ҳәм спорт тараўында өз қәбилетлерин көрсетиўи ушын зәрүрли шараятлар жаратып бериў мақсетинде «Дослық» каналында спорттың ескек есиў түри бойынша беллесиў шөлкемлестирилди. Беллесиў даўамында «Мард ўғлон» сыйлығының ийеси И.Мәмбетназаров усы спорт түри бойынша өз тәжирийбесин бөлисти ҳәм жас спортшылар өзлерин қызықтырған сораўларына жуўап алды.
Жаслар орайында шөлкемлестирилген «Компьютер саўатлылығы ҳәм мәлимлеме коммуникация технологияларының программашылары» дөгерегиниң басшылары жаслар ушын компьютер технологиялары ҳәм интернеттен нәтийжели пайдаланыў бойынша семинар-тренинг өткерди.
Акция шеңберинде бүгинги күнде жоқары итибар қаратылып атырған китапқумарлықты арттырыў, китап оқыўды кең түрде үгит-нәсиятлаў илажларына да айрықша итибар қаратылды. Төртинши басламаның талапларын орынлаў мақсетинде Жаслар аўқамы Қарақалпақстан Республикалық Кеңеси тәрепинен Жаслар орайының мәлимлеме-ресурс орайына 400 китап саўға етилди. Жас китапқумарлар арасында «Мен оқыған китап» темасында интерактив шынығыў өткерилди.
Жаслар орайының «Шаштәрезлик» дөгереги тәрепинен болса, тәжирийбели стилист ҳәм визажистлер мастер-класс шөлкемлестирип, онда ҳаял-қызларға усы кәсиптиң сырлары, жеке исбилерменлик жумысын шөлкемлестириў бойынша мәсләҳәтлер берилди.
М.ПИРНАЗАРОВА,
Қарақалпақстан хабар агентлигиниң шолыўшысы.