Халықаралық көлемде ең талап күшли болып турған инглис тили бойынша билимлерди баҳалаў системасы – IELTS ке талабанлар саны республикамызда жыл сайын артып бармақта. Буған тийкарғы себеплердиң бири дүньяның 140 мәмлекетиндеги 10 мыңнан артық шөлкем IELTS сертификатын тән алыўы болса керек.
Нөкис қаласындағы 37-санлы айырым пәнлер тереңлестирилип оқытылатуғын класлары бар улыўма билим бериў мектеби билим бериў сапасының жоқарылығы ҳәм оқыўшыларының пәнлер олимпиадасы ҳәм ҳәр қыйлы таңлаўлардағы жетискенликлери менен тек ғана республикамызда емес, ал, пүткил Өзбекстанға белгили оқыў дәргайларының бири болып табылады.
Быйылғы 2022-2023-оқыў жылында мектеп оқыўшылары айтарлықтай табысларды қолға киргизиўге миясар болды. Яғный, 70 оқыўшы инглис тилинен халықаралық бақлаў системасы бойынша IELTS сертификатын алыўға еристи.
-Мектебимизде улыўма 3126 оқыўшы оқып билим алмақта,-дейди бизге усы оқыў орнының директоры Айдос Артықов.-Баслаўыш кластан соң оқыўшылар өзлериниң қызығыўшылығына қарай тийкарынан инглис, рус тиллери ҳәм математика пәнлерине қәнигелестирилген классларда билим алады ҳәм оларға өз кәсибиниң маманы болған тәжирийбели муғаллимлер сабақ береди. Соның менен бирге, мектебимиз питкериўшилери де оқыўшыларымызға ғамқорлық көрсетип, оларға өзлериниң жәрдемин берип келмекте. Усындай қайырқом инсанларының бири Атабек Исмайлов быйылғы жылы өзиниң есабынан материаллық жәрдемге мүтәж 10 оқыўшыға IELTS сертификатын алыў ушын белгиленген төлемлерин төлеп берип, олардың алғысын алыўға миясар болды. Бизлер IELTS сертификатын алған 70 оқыўшы менен шекленип қалмақшы емеспиз. Алдағы ўақытлары олардың санын еле де көбейтип, мектептиң республикамыздағы рейтинг дәрежесин жоқарылатыўды мақсет еткенбиз.
Мағлыўмат ушын айтатуғын болсақ, усы мектептиң және 32 оқыўшы IELTS сертификатын алыў ушын имтихан тапсырып, олардың жуўмағын күтпекте.
А.Оразов,
Қарақалпақстан хабар агентлиги шолыўшысы