Ташкентте «Қарақалпақ мәденият күнлери» өткерилмекте

Усы жылдың 25‒28-май күнлери Ташкент қаласында «Қарақалпақ мәденияты күнлери» өкерилмекте.

26-май күни Әлийшер Наўайы атындағы мәмлекетлик академиялық үлкен театрында шөлкемлестирилген мәресимде Өзбекстан Республикасы Мәденият министриниң орынбасары М.Мажидов, Қарақалпақстан Республикасы Мәденият министри Қ.Турдиевлар сөзге шығып, ҳүрметли Президентимиз Шавкат Мирзиёевтиң 2022-жыл 2-февраль күнги «Мәденият ҳәм көркем өнер тараўын буннан былай да раўажландырыўға байланыслы қосымша илажлар ҳаққында»ғы қарары тийкарында өткерилип атырған «Мәденият күнлери» илажлары халқымыз арасындағы туўысқанлық, дослық қатнасықларын беккемлеў менен бирге, өз-ара мәдений байланысларды және де раўажландырыўда үлкен әҳмийетке ийе екенлигин айрықша атап өтти.

Илажда Бердақ атындағы Қарақалпақ мәмлекетлик академиялық музыкалы театрының симфониялық оркестри, «Айқулаш» қарақалпақ мәмлекетлик миллий фольклор ансамбли ҳәм Өзбекстан мәмлекетлик филармониясы Қарақалпақстан Республикасы бөлими көркем өнер шеберлериниң атқарыўындағы концерт бағдарламасы қойып берилди.

‒ «Қарақалпақ мәденият күнлери»ниң жигирма еки жылдан соң және Ташкент қаласында өткерилиўи үлкен тарийхый ўақыя, десек асыра айтқан болмаймыз. Бүгин қарақалпақ мәденияты ҳәм көркем өнериниң бийтәкирар үлгилерин тамаша етиўге келген тамашагөйлеримиздиң жүзиндеги қуўанышты сөз бенен тәрийплеў қыйын, әлбетте. Өткерилип атырған илажлар дослық ҳәм дөретиўшилик байланысларымыздың беккемлениўине тийкар жаратады,‒дейди Өзбекстан ҳәм Қарақалпақстан халық артисти Гүлхатийша Айымбетова.

Бүгин Бердақ атындағы Қарақалпақ мәмлекетлик академиялық музыкалы театрының симфониялық оркестри Өзбекстан мәмлекетлик консерваториясында, Республикамыз көркем өнер шеберлери Өзбекстан мәмлекетлик көркем өнер ҳәм мәденият институтында, «Айқулаш» Қарақалпақ мәмлекетлик миллий фольклор ансамбли жәмәәти Өзбекстан мәмлекетлик хореография академиясында дөретиўшилик ушырасыўлар өткерди.