2-май күни Өзбекстан Республикасы Президенти Шавкат Мирзиёевтиң Түркия Республикасы Президенти Режеп Таййип Эрдоған менен телефон арқалы сөйлесиўи болып өтти.
Мәмлекет басшылары пүткил мусылман әлеми ушын – муқаддес әййям – Рамазан ҳайыты мүнәсибети менен бир-бирин ҳәм мәмлекетлеримиздиң дос халықларын қызғын қутлықлап, тынышлық-татыўлық, абаданлық ҳәм раўажланыў тилеклерин билдирди.
Усы жылы март айында Өзбекстанға әмелге асырылған жоқары дәрежедеги сапарда пайдалы нәтийжелерге ерисилгени, олар еки тәреплеме қатнасықларды кең көлемли стратегиялық шериклик дәрежесине көтериўге хызмет еткени үлкен қанаатланыўшылық пенен атап өтилди.
Өз-ара делегациялар сапарлары жедел әмелге асырылмақта. Жылдың басынан еки тәреплеме саўда көлеми дерлик 20 процентке артты. Мәмлекетимизде Түркияның жетекши компанияларының қатнасыўында заманагөй өндирис қуўатлықларын жаратыў ҳәм инфраструктураны модернизациялаў бойынша ири инвестициялық жойбарлар даўам еттирилмекте. Билимлендириў ҳәм мәдений-гуманитарлық тараўлардағы бирге ислесиў кеңеймекте.
Өзбекстан ҳәм Түркия жетекшилери халықаралық сиясаттың әҳмийетли мәселелери бойынша да пикир алысты. Түркий мәмлекетлер шөлкеминиң гезектеги саммитине таярлық көриў мәселелерин додалады.
Президентлердиң телефон арқалы сөйлесиўи әдеттегидей өз-ара исеним ҳәм дослық руўхында болып өтти.
ӨзА