Өзбекстандағы БМШ қәўендерлигиндеги көпшериклик траст фонды шеңберинде әмелге асырылып атырған жойбарлар менен жақыннан танысыў мақсетинде Европа аўқамы делегациясы ҳәм оған ағза мәмлекетлер дипломатиялық корпусларының басшылары, БМШ тың Өзбекстандағы ўәкилханасы ўәкиллеринен ибарат делегация республикамызда болмақта.
Сапар етиў шеңберинде Қарақалпақстан Республикасы Жоқарғы Кеңесинде жергиликли ғалаба хабар қуралларының ўәкиллери ушын баспасөз конференциясы болып өтти.
Илажда делегация басшысы Шарлот Адриан ханым, Европа аўқамына ағза мәмлекетлердиң елшилери, дипломатиялық корпусларының басшылары республикамызға сапары даўамында алған тәсирлери, келешектеги режелери менен ортақласты.
Атап өтилгениндей, Президент басшылығында Аралбойы аймағында экологиялық апатшылық ақыбетлерин жумсартыў ҳәм жасыл тоғайзарлар менен қапламалар пайда етиў бойынша әмелге асырылып аырған жумыслар делегация ағзаларында айрықша тәсир қалдырды. Бундай қайырлы истен Европа аўқамы делегациясы ҳәм оған ағза мәмлекетлер шетте қалмайды. Аймақта жасыл тоғайзарлар пайда етиў, ирригация системаларын жақсылаў, соңын ала аўыл хожалығын раўажландырыўға өзлериниң салмақлы үлесин қосады.
Бүгинги күнниң әҳмийетли мәселелери болған денсаўлықты сақлаў, билимлендириў тараўларында бир қатар жойбарларды әмелге асыыў режелестирилген. Мойнақ районында әмелге асырылып атырған «Аралдағы бағым» (My garden in the Aral Sea) агро-экотуризм бағдарындағы жойбары мине усылардан бири болып табылады. Делегация ағзалары жойбар менен танысып ғана қалмастан, өзлери де нәл егиў акциясына қатнасты.
Илажда ғалаба хабар қуралларының ўәкиллери өзлерин қызықтырған сораўларға жуўап алды.
Делегация ағзалары сапар даўамында Бердақ атындағы Қарақалпақ мәмлекетлик университетинде, Тахтакөпир районда болып, БМШ қәўендерлигиндеги көпшериклик траст фондының қаржыландырыўда әмелге асырылатуғын жойбарлар менен танысты.
Қарақалпақстан хабар агентлиги