Kitobning dastlabki sahifalaridayoq ijodkorning dadil fikrlari, teran mulohazalari, oʻtkir tahlillarga boy tafakkur shamoliga duch kelasiz. “Umid chirogʻi qachon yonadi?“ sarlavhali materialda Orol dengizi fojiasi haqidagi tahlil, fakt, raqamlarga boy fikrlar berilgan. Ijodkorning bundan chorak asr muqaddam yozgan ushbu publitsistik asarida aytilgan “Xalq koʻp yillardan beri Orolni muhokama qiladi. Baliqchilar, paxtakorlar, jurnalistlar, agronomlar, oʻqituvchilar, olimlar – xullas, hammaning yuragida Orolning qaygʻusi bor. Birovlar unga oʻlim hukmini chiqarsa, chiqaraversin, lekin xalq oʻz dengizining oʻlishini istamaydi“, degan fikrlar bugungi kun uchun ham dolzarbdir.

Jahon iqtisodiyoti va diplomatiya universitetida oʻtkazilgan “Abadiyat ostonasida“ kitobining taqdimotida adabiyotshunoslar, olimlar, talaba-yoshlar mana shunday oʻtkir mulohazalar, fikrlar egasi Jamol Kamol suhbatidan bahramand boʻldi.

– Ijodkorlar bilan uchrashish hamisha bayram maqomida boʻladi, – deydi professor Narzulla Joʻrayev. – Jamol Kamol kabi tarjimon, shoirlar kamdan-kam tugʻiladi. Bu inson xalqimiz, adabiyotimiz, umuman maʼnaviyatimiz uchun juda katta xizmat qilib kelmoqda.

Tadbir soʻnggida shoir sheʼrlarini mahorat bilan oʻqigan, shoirga eng mazmunli va qiziqarli savol bergan talabalarga muallif dastxati tushirilgan Jamol Kamol “Saylanma“sining uch jildi sovgʻa qilindi.