Qarshida 9-may – Xotira va qadrlash kuni munosabati bilan adabiyotimizning buyuk namoyandasi, madhiyamiz muallifi, O‘zbekiston Qahramoni, xalq shoiri Abdulla Oripovning 1992-2016 yillarda yashagan Qarshi shahridagi uyi peshtoqiga ijodkorning byusti va yodgorlik lavha o‘rnatildi.
Shoir o‘zi tug‘ilgan, kamolga yetgan vohani, uning sodda va samimiy odamlarini qanchalik sevgan, she’r va dostonlarida baralla kuylagan bo‘lsa, Qashqadaryo xalqi ham uni shunchalik ardoqlaydi. Adib xotirasini abadiylashtirish uchun amalga oshirilayotgan bu kabi sa’y-harakatlar viloyat ahlini shod etayotgani ham shundan.
Yodgorlikning ochilish marosimida davlat va jamoat tashkilotlari, keng jamoatchilik vakillari, ijodkorlar, shoirning yaqinlari va yoshlar ishtirok etdi. Tadbirda adibning o‘zbek adabiyoti ravnaqiga qo‘shgan hissasi, davlat va jamoat ishlaridagi, yosh ijodkorlarni tarbiyalashdagi jonkuyarligi haqida so‘z yuritildi. O‘quvchi-yoshlar tomonidan shoir ijodiga mansub she’rlar o‘qildi.
