Өзбекстан Республикасы Министрлер Кабинетиниң 2019-жыл 3-декабрьде «Жоқары билимлендириў мәкемелерин басқышпа-басқыш өзин-өзи қаржыландырыў системасына өткериў ҳаққында»ғы 967-санлы қарары қабыл етилди.
Қарарға муўапық, 2020-жыл 1-январьдан баслап төмендеги 10 жоқары оқыў орны тәжирийбе-сынақ тәризинде өзин-өзи қаржыландырыў системасына өтеди:
1) Самарқанд мәмлекетлик шет тиллери институты;
2) Самарқанд экономика ҳәм сервис институты;
3) Ташкент мәмлекетлик юридика университети;
4) Ташкент мәмлекетлик экономика университети;
5) Ташкент қаржы институты;
6) Ташкент мәмлекетлик шығыстаныў институты;
7) Ташкент фармацевтика институты;
8) Өзбекстан мәмлекетлик жәҳән тиллери университети;
9) Үргениш мәмлекетлик университети;
10) Ташкент темир жол инженерлери институты.
Бул жоқары оқыў орынларының илимий-педагогикалық потенциалының жоқарылығы, финанслық жумысларының турақлылығы, материаллық-техникалық базасының жетерли дәрежеделиги, билимлендириў хызметлери базарында усы қәнигеликлерге талап жоқарылығы есапқа алынған.
Қарарға муўапық, өзин-өзи қаржыландырыў системасына өтип атырған жоқары оқыў орнында төлемли контракт тийкарында билим алып атырған студентлердиң контракт төлеў мүддетлери тәреплердиң келисимине муўапық шәртнама тийкарында белгиленеди.
Мағлыўмат ушын, Өзбекстан Республикасы Президентиниң 2019-жыл 11-июльда қабыл етилген ПҚ-4391-санлы қарары тийкарында 2020-жылдан баслап билимлендириў хызметлери базарында жоқары оқыў орынларының айырым бакалавриат билимлендириў бағдарлары ҳәм магистратура қәнигеликлерине талап жоқарылығы ҳәм финанслық турақлылығын есапқа алып, оларды басқышпа-басқыш өзин-өзи қаржыландырыў системасына өтиў белгиленген.
Ислам Матеков,
Қарақалпақстан хабар агентлиги.