ФОТОРЕПОРТАЖ
Нукус Олимпия ва паралимпия спорт турларига тайёрлаш маркази Президентимиз Шавкат Мирзиёевнинг 2021 йил 5 ноябрдаги “Давлат спорт таълим муассасалари фаолиятини мутлақо янги тизим асосида ташкил қилиш чора-тадбирлари тўғрисида” қарорига асосан қайта ташкил этилган.
Ҳозирда марказда фаолият кўрсатаётган 19 та олимпия, 5 та паралимпия ва 1 та миллий спорт тури бўйича бўлимларда жами 500 га яқин спортчи маҳорат оширмоқда. 89 нафар малакали мураббий ўғил-қизларга гандбол, баскетбол, енгил атлетика, велоспорт, қиличбозлик, кураш, дзюдо, бокс, сузиш, оғир атлетика каби спорт турларидан сабоқ бермоқда.
Марказга иқтидорли спортчиларни жалб қилиш мақсадида Қорақалпоғистон Республикаси шаҳар ва туманларидаги спорт мактабларининг тарбияланувчилари билан доимий учрашувлар ўтказилиб, саралаш ишлари олиб борилмоқда. 2023/2024 ўқув йилининг сентябрь-ноябрь ойлари давомида республика миқёсида ўтказилган мусобақаларда совринли ўринларни эгаллаган спортчилардан сараланган 124 нафар ўқувчи марказга ўқишга қабул қилинган.
Марказнинг кўплаб ўқувчилари қатор нуфузли спорт мусобақаларида муваффақиятли иштирок этмоқда. Жумладан, 2023 йил давомида улар жаҳон биринчилиги, Осиё чемпионати, халқаро турнирлар, Қорақалпоғистон ва Ўзбекистон чемпионати мусобақаларида жами 418 та медални қўлга киритган бўлиб, шундан 131 таси олтин, 117 таси кумуш ва 170 таси бронза медалларини ташкил этди.
ЎзА фотомухбири Мақсад ҲАБИБУЛЛАЕВ олган суратлар