Қорақалпоғистон Республикаси прокуратураси ташаббуси билан тегишли вазирликлар билан ҳамкорликда республика ҳудудидаги 12 та олий таълим муассасаси талабалари ўртасида спортнинг мини футбол, баскетбол ва шахмат турлари бўйича ташкил этилган “Прокурор кубоги” спорт мусобақаси якунига етди.
Спорт мусобақасида жами 6 минг 960 нафар талаба, шундан 3 минг 840 нафар йигит ва 3 минг 120 нафар қиз фаол иштирок этди.
Мусобақалар якунида мини футбол бўйича Қорақалпоқ давлат университети, баскетбол тури бўйича ўғил болалар ўртасида Ўзбекистон давлат жисмоний тарбия ва спорт университети Нукус филиали, қизлар ўртасида Қорақалпоқ давлат университети, шахмат бўйича ўғил болалар ўртасида Қорақалпоқ давлат университети, қизлар ўртасида Ўзбекистон давлат жисмоний тарбия ва спорт университети Нукус филиали биринчи ўринларни эгаллади. Ғолибларга медаль, диплом ва қимматбаҳо совғалар топширилди.
Тадбир иштирокчиларига таниқли санъаткорлар ҳамда ҳаваскор ёшлар иштирокидаги концерт дастури намойиш этилди.
Довуд Абибуллаев,
ЎзА мухбири