Испаниянинг Ла-Нусия шаҳрида бокс бўйича ҳаваскорлар ўртасидаги «Boxam-2024» турнирининг илк кунида тўрт нафар ҳамюртимиз рингга кўтарилди.
Мусобақанинг -63,5 кг вазн тоифасида Руслан Абдуллаев португалиялик Дуарте Давидни, -71 кг вазнда Ҳавасбек Асадуллаев италиялик Cавалларо Салваторени, Асадхўжа Мўйдинхўжаев эса руминиялик Нистреану Марcелни, вазни -80 кг бўлган чарм қўлқоп усталари ўртасида мамлакатимиз шарафини ҳимоя қилаётган Жасурбек Йўлдошев қирғизистонлик Эркин Адилбекни 5:0 ҳисобида енгиб, навбатдаги босқичга йўл олди.
Маълумот учун, 4 февраль кунига қадар давом этадиган ушбу мусобақа терма жамоамиз аъзолари учун Италияда 4-11 март кунлари ўтказиладиган «Париж-2024» Олимпия ўйинларига йўлланма берувчи мусобақадан олдин сўнгги босқич тайёргарлик вазифасини ўтаб беради. Турнирда боксчиларимиз Тўлқин Қиличев, Хуан Энрике, Акмал Ҳасанов ва Сирожиддин Наимов мураббийлиги остида иштирок этмоқда.
Жавоҳир Тошхўжаев, ЎзА