Biz kúndelikli turmısımızda ayırım kóshelerde suw tarmaqları qurılmaǵan bolsa da, suw ushın tólem alınıp atırǵanlıǵın esitetuǵın edik. Al, ayırım kóp qabatlı turaq jaylardıń joqarǵı qabatlarına suw shıqpaytuǵınlıǵı belgili. Olar da suw ushın pul tólep kelmekte.
– Máselen, Tórtkúl rayonlıq Tutınıwshılardıń huqıqların qorǵaw jámiyetine rayonnıń «Nawrız» mákan puqaralar jıyınında jasaytuǵın puqara Dárman Qazaqovadan usınday másele boyınsha arza kelip túsken,-deydi Qaraqalpaqstan Respublikası Tutınıwshılardıń huqıqların qorǵaw jámiyetleri Federaciyasınıń sektor baslıǵı D.Dáwletbaeva. – Ol óz arzasında ishimlik suwınan qarızdarlıǵı boyınsha narazılıǵın bildirgen. Onıń arzası jámiyet tárepinen úyrenip shıǵılıp, tutınıwshınıń jasap turǵan aymaǵında ishimlik suw tarmaǵı ótkerilmegeni, tutınıwshınıń ishimlik suwdan hesh qanday qarızdarlıǵı joq ekenligi anıqlandı.
Sonday-aq, jámiyetke nasaz, sapasız ónimlerdiń satılıwı tuwralı da kóplegen múrájatlar kelip túspekte.
Atap aytqanda, Tórtkúl rayonlıq Tutınıwshılardıń huqıqların qorǵaw jámiyetine Ellikqala rayonı Sarabiy Awıl puqaralar jıyınında jasaytuǵın puqara Aybek Rozumbetovtan arza kelip, onda usı jıldıń 3-aprel kúni Tórtkúl rayonı Sawda kompleksi aymaǵında jaylasqan 645-sanlı dúkannan 540 mıń sumǵa suw shıǵarıw nasosın satıp alǵanlıǵın, onı úyine alıp barǵanında jaramsız bolıp shıqqanın, dúkanshı bolsa, onı almastırıp beriwden bas tartqanın kórsetken. Múrájat úyrenip shıǵılıp, sol kúnniń ózinde jaramsız suw nasosı jaramlısına almastırıldı.
Sonday-aq, Qońırat rayonı N.Tájimuratov kóshesinde jasaytuǵın puqara M.Berdimuratov rayondaǵı sawda kompleksinen paydalanılǵan Samsung J5 telefonın 600 mıń sumǵa satıp aladı. Biraq, bir kúnnen onıń nasaz ekenligi málim boladı.
Bunnan narazı bolǵan tutınıwshı satıwshıdan telefonın ońlatıp beriwin yamasa aqshasın qaytarıp beriwin talap etkeninde, hár qıylı sıltawlar menen onıń talabı juwapsız qaldırıladı.
Usı másele boyınsha tutınıwshı Qońırat rayonlıq tutınıwshılardıń huqıqların qorǵaw jámiyetine múrájat etip, onıń 600 mıń sumı ózine qaytarıp berildi.
Aldıńǵı maǵlıwmatlarımızda ayırım mákemelerdiń puqaralar tárepinen kelip túsken kommunal tólemlerin óz esap betlerine ótkeriwde qáte-kemshilikler bolıp atırǵanlıǵın bildirgen edik.
Jaqında, jáne usınday unamsız jaǵday anıqlandı hám ámiwdáryalı tutınıwshınıń 9 jıl burın tólegen aqshaları óz esap betine túsirip berildi.
Yaǵnıy, Ámiwdárya rayonlıq tutınıwshılardıń huqıqların qorǵaw jámiyetine rayonnıń «Tolqın» awıl puqaralar jıyınında jasaytuǵın puqara T.Atajanov 2009-jıldaǵı bir neshe aydıń tábiyǵıy gazı ushın óz pensiyasınan tólep kelgen bolsa da usı aqshalar onıń esap betine túspey qalǵan. Rayonlıq gaz xızmetkerlerinen qarızdarlıǵı tuwralı eskertiw kelgeninen hayran bolıp múrájat etken eken.
Usı múrájat jámiyet qánigeleri tárepinen úyrnilip, tutınıwshınıń 9 jıl burınǵı bir neshe ay ushın tólegen aqshaları reestrlerde tutınıwshınıń gaz dáptershesiniń abonent nomeri kórsetilmegeni sebepli iyesi anıqlanǵanǵa shekem 8888-sanlı abonet nomerine avtomat túrde ótkerilgenligi anıqlanıp óz esap betine ótkerip berildi.
Qaraqalpaqstan xabar agentligi.