Qaraqalpaqstan Respublikası hákimshilik sudınıń baslıǵı A.Nurlipesovtıń basshılıǵında májilis ótkerildi.
Kópshiliktiń xabarı bar, Qaraqalpaqstan Respublikası Joqarǵı Keńesiniń 2024-jıl 28-dekabr kúngi Prezidium qararı menen sud sistemasında jańa tayınlawlar ámelge asırılǵan edi.
Atap aytqanda, Qaraqalpaqstan Respublikası hákimshilik sudınıń sudyası Ruslan Jumabaev sudyalıq wákilligi múddeti dáwirine Qaraqalpaqstan Respublikası Nókis rayonlararalıq hákimshilik sudınıń baslıǵı lawazımına, Nókis rayonlararalıq hákimshilik sudınıń sudyası Gúlmira Baynazarova sudyalıq wákilligi múddeti dáwirine Qaraqalpaqstan Respublikası hákimshilik sudınıń sudyası lawazımına tayınlandı.
Sonday-aq, “Sudlar haqqında”ǵı Ózbekstan Respublikası Nızamınıń 69-statyası hám “Qaraqalpaqstan Respublikası Joqarǵı Keńesiniń Reglamenti haqqında”ǵı Qaraqalpaqstan Respublikası Nızamınıń 41-statyasına muwapıq, Qaraqalpaqstan Respublikası Joqarǵı Keńesiniń Prezidiumı qararı menen Sara Karamatdinova sudyalıq lawazımında bolıwdıń birinshi bes jıllıq múddetke Qaraqalpaqstan Respublikası Nókis rayonlararalıq hákimshilik sudınıń sudyası lawazımına tayınlandı.
Májiliske Qaraqalpaqstan Respublikası Joqarǵı Keńesiniń sud-huqıq hám korrupciyaǵa qarsı gúresiw máseleleri komitetiniń baslıǵı A.Atajanov qatnasıp, sudyalardı jańa lawazımları menen qutlıqlap, aldaǵı jumıslarında tabıslar tiledi.
Bunnan soń, Qaraqalpaqstan Respublikası hákimshilik sudınıń Prezidium májilisi ótkerilip, onda sudyalıq lawazımında bolıwdıń birinshi bes jıllıq múddetine tayınlanǵan Nókis rayonlar aralıq hákimshilik sudınıń sudyası Sara Karamatdinovanıń antı tıńlandı.
Qaraqalpaqstan Respublikası hákimshilik sudınıń baslıǵı A.Nurlipesov shıǵıp sóylep, sudyalar korpusına jańadan qosılıp atırǵan wákilge isenim bildirip, oǵan ádil sudlawdı ámelge asırıwday mashaqqatlı sonıń menen birge, maqtanıshlı iste tabıslar tiledi.
Ilajda qatnasqan sudyalar oǵan eń jaqsı tileklerin bildirdi. Óz gezeginde, sudyalar korpusına jańadan qosılǵan wákil S.Karamatdinova da shıǵıp sóylep, bildirilip atırǵan isenimdi aqlawǵa tek ǵana nızam tiykarında ádil qarar shıǵarıwǵa, bul ushın bilim hám tájiriybesin ayamay jumsawǵa wáde etti. Ant qabıllaǵan sudyaǵa Ózbekstan Respublikası Konstituciyası hám “Sudlar haqqında”ǵı Ózbekstan Respublikası nızamınıń kitabı tapsırıldı.
Qaraqalpaqstan xabar agentligi