Qaraqalpaqstan Respublikası sudında ótkerilgen gezektegi Prezidium májilisinde birinshi márte sudyalıq lawazımına tayınlanǵan sudyanıń ant qabıllaw máresimi ótkerildi.
Májiliste Qaraqalpaqstan Respublikası Joqarǵı Keńesiniń 2024-jıl 28-dekabr kúngi Prezidium qararı menen sudyalıq lawazımında bolıwdıń birinshi bes jıllıq múddetine tayınlanǵan Qaraqalpaqstan Respublikası puqaralıq isleri boyınsha Ámiwdárya rayonı sudınıń sudyası Muhabbat Kaypovanıń antı qabıl etildi.
Ilajda Qaraqalpaqstan Respublikası sudınıń baslıǵı K.Tarixov shıǵıp sóylep, Qaraqalpaqstan sudyalar korpusına jańadan qosılıp atırǵan wákilge isenim bildirip, ádil sudlawdı ámelge asırıwday mashaqqatlı, sonıń menen birge, maqtanıshlı iste tabıslar tiledi. Sudlarda uzaq jıllardan berli dawam etip kiyatırǵan «Ustaz-shákirt» dástúri tiykarında jańa wákilge tájiriybeli sudya ustaz etip biriktirildi.
Ilajda ustaz sudyalar hám basqalar shıǵıp sóylep, jas sudyaǵa ózleriniń eń jaqsı tileklerin bildirdi.
Álbette, jańadan sudyalar korpusına qosılıp atırǵan wákil ózine bildirilip atırǵan isenimdi aqlawǵa tek ǵana nızam tiykarında ádil qarar shıǵarıwǵa, bul ushın bar bilim hám tájiriybesin ayanbay jumsawǵa wáde etti.
Ant qabıllaǵan sudyaǵa ádil sudlawdı ámelge asırıwda eń zárúr qollanba Ózbekstan Respublikası Konstituciyası hám “Sudyalar ádebi” kitabı sawǵa etildi.
Qaraqalpaqstan xabar agentligi