Tórtkúl rayonındaǵı «Qwshnazar paxtakor» fermer xojalıǵında gúzgi biyday tárbiyası, suwǵarıw sistemaların qazıw, tazalaw, betonlaw, awıl xojalıǵı texnikaların ońlaw jumıslarına baǵıshlanǵan kórgizbeli seminar bolıp ótti.
Oǵan rayondaǵı sektor basshıları, hákim orınbasarları, awıl xojalıǵı hám suw xojalıǵı qánigeleri, fermerler qatnastı.
Seminarda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı Shuhrat Teshaev hám basqalar shıǵıp sóylep, rayondaǵı egislik jerlerden nátiyjeli paydalanıw, atız shetlerine terek nállerin egiw, atızlarǵa jergilikli tóginlerdi shıǵarıw, suwdı únemlewshi texnologiyalardı engiziw boyınsha ózleriniń másláhátlerin berdi.
Sonıń menen birge, ilajda awıl xojalıǵı texnikaların ońlaw jumıslarına ayrıqsha itibar qaratıw boyınsha juwapkerlerge tiyisli kórsetpeler berilip, ósimlik zıyankeslerine qarsı qollanılatuǵın biolaboratoriyalıq ónimler, tamshılatıp suwǵarıw texnologiyalarınan nátiyjeli paydalanıw hám jap-salmalardı betonlaw isleri boyınsha ámeliy kórgizbeler shólkemlestiredi.
Bunday seminarlar respublikamızdıń barlıq rayonlarında bolıp ótpekte.

Adilbay Orazov,
Qaraqalpaqstan xabar agentligi sholıwshısı