Nukusdagi Kino-konsert zalida tibbiyot xodimlari kuniga bag‘ishlangan tadbir bo‘lib o‘tdi. Unda Qoraqalpog‘iston Respublikasi Jo‘qorg‘i Kengesi Raisi A.Orinbayev ishtirok etib, soha xodimlari va faxriylarni kasb bayrami bilan tabrikladi.
Tadbirda ta’kidlanganidek, o‘tgan qisqa davr mobaynida sohaga oid qabul qilingan farmon va qarorlar zamonaviy tibbiyot muassasalarining qad rostlashida, sohaning moddiy-texnik bazasini mustaxkamlashda, chekka hududlardagi tibbiyot muassasalarini malakali mutaxassislar bilan ta’minlashda alohida ahamiyat kasb etmoqda. Prezidentimiz tomonidan qabul qilingan “Qoraqalpog‘iston Respublikasida 2022-2024 yillarda aholi salomatligini muhofaza qilishni yanada kuchaytirish to‘g‘risida”gi qaror asosida Nukus shahar tibbiyot birlashmasi tarkibida 20 o‘rinli xirurgiya bo‘limi hamda og‘ir bemorlar uchun 20 o‘rinli palliativ yordam ko‘rsatadigan bo‘lim tashkil etilib, Mo‘ynoq, Bo‘zatov, Qorao‘zak, Taxtako‘pir, Shumanay, Qonliko‘l tumanlari ko‘p tarmoqli markaziy poliklinikalarining ayrim tor soha mutaxassislari (kardiolog, onkolog, urolog, otolaringolog, bolalar otolaringologi, nevrolog, bolalar nevrologi) lavozimlari oshirildi. Shuningdek, surunkali kasalligi va nogironligi mavjud bo‘lgan bolalar uchun 120 o‘rinli bolalar tibbiy reabilitatsiya markazi tashkil etish ishlari olib borilmoqda.
Joriy yilda Investitsiya dasturi asosida Respublika shoshilinch tibbiy yordam ilmiy markazi filiali binosida, Kegeyli tumanidagi “Yangi O‘zbekiston” massivida joylashgan qishloq shifokorlik punktida, Amudaryo tuman tibbiyot birlashmasi tug‘uruq bo‘limi, Nukus tumanidagi Nogironligi bo‘lgan shaxslarni reabilitatsiya qilish va protezlash markazi binosida qurilish hamda rekonstruksiya ishlari bajarildi. Qoraqalpog‘iston Respublikasi Jo‘qorg‘i Kengesi Prezidiumi qarori asosida 6 ta tibbiyot ob’ektida 40,8 milliard so‘mlik qurilish-ta’mirlash ishlari olib borilmoqda.
Tadbirda bayram munosabati bilan soha fidoyilariga mamlakatimiz va Qoraqalpog‘iston Respublikasining faxriy unvonlari, orden va medallari, ko‘krak nishonlari, faxriy yorliqlar topshirildi.
Tantanali tadbir san’at ustalari konserti bilan yanada fayzli bo‘ldi.
Dovud Abibullayev, Maqsad Habibullayev (surat),
O‘zA muxbirlari