Qoraqalpoq davlat universitetining chet tili va adabiyoti taʼlim yoʻnalishiga hujjat topshirib, test sinovlarida 176,5 ball toʻplab, oʻqishga davlat granti asosida qabul qilinishiga atigi 0,1 ball yetmay qolgan qoraqalpogʻistonlik Shahnoza Qoylibayeva 4 foizlik imtiyozni qoʻlga kiritdi.
– Davlat grantiga eng oxiri boʻlib kirgan abituriyentning balli 176,6 ekan. Meniki esa 176,5. Kontrakt. Ota-onamga qanday aytishni bilmadim. Ularni ortiqcha qiyin vaziyatga solib qoʻyish niyatim yoʻq edi. Endi kontraktda oʻqiymanmi, degan ikkilanish bor edi, – deydi Sh.Qoylibayeva. – Shunday vaziyatda 4 foizlik imtiyozga ilinganimni eshitganimda quvonchimni qanday izohlashni ham bilmayman.Shahnoza Prezidentimiz tashabbusi bilan xotin-qizlarning yuqori taʼlim olish imkoniyatini kengaytirish maqsadida qabul qilingan 4 foizlik davlat granti asosida ajratilgan kvota boʻyicha oʻqiydigan boʻldi.
U Qoraqalpogʻiston Respublikasi uchun ajratilgan umumiy 53ta oʻrinning birini egalladi. Umuman Qoraqalpogʻiston Respublikasi Mahalla va oilani qoʻllab-quvvatlash vazirligi va uning tumanlardagi boʻlimlari tomonidan 2 ming 733 xotin-qizlarning murojaatlari koʻrib chiqilib, shundan 1370 xotin-qizlarga ishchi guruhning xulosalari asosida tavsiya berilgan.
Qoraqalpogʻiston Respublikasi Mahalla va oilani qoʻllab-quvvatlash vazirligida imtiyozni qoʻlga kiritgan 53 nafar talabaga guvohnomalar topshirildi.
Ye.Qanoatov, OʻzA