Қорақалпоқ давлат университетининг чет тили ва адабиёти таълим йўналишига ҳужжат топшириб, тест синовларида 176,5 балл тўплаб, ўқишга давлат гранти асосида қабул қилинишига атиги 0,1 балл етмай қолган қорақалпоғистонлик Шаҳноза Қойлибаева 4 фоизлик имтиёзни қўлга киритди.
– Давлат грантига энг охири бўлиб кирган абитуриентнинг балли 176,6 экан. Меники эса 176,5. Контракт. Ота-онамга қандай айтишни билмадим. Уларни ортиқча қийин вазиятга солиб қўйиш ниятим йўқ эди. Энди контрактда ўқийманми, деган иккиланиш бор эди, – дейди Ш.Қойлибаева. – Шундай вазиятда 4 фоизлик имтиёзга илинганимни эшитганимда қувончимни қандай изоҳлашни ҳам билмайман.
Шаҳноза Президентимиз ташаббуси билан хотин-қизларнинг юқори таълим олиш имкониятини кенгайтириш мақсадида қабул қилинган 4 фоизлик давлат гранти асосида ажратилган квота бўйича ўқийдиган бўлди.
У Қорақалпоғистон Республикаси учун ажратилган умумий 53та ўриннинг бирини эгаллади. Умуман Қорақалпоғистон Республикаси Маҳалла ва оилани қўллаб-қувватлаш вазирлиги ва унинг туманлардаги бўлимлари томонидан 2 минг 733 хотин-қизларнинг мурожаатлари кўриб чиқилиб, шундан 1370 хотин-қизларга ишчи гуруҳнинг хулосалари асосида тавсия берилган.
Қорақалпоғистон Республикаси Маҳалла ва оилани қўллаб-қувватлаш вазирлигида имтиёзни қўлга киритган 53 нафар талабага гувоҳномалар топширилди.
Е.Қаноатов, ЎзА