Umumiy mukofot jamg‘armasi 750 ming AQSH dollaridan iborat “Freestyle Chess Grand Slam Tour-2025” turnirining so‘nggi o‘ninchi ishtirokchisini aniqlash bo‘yicha o‘tkazilgan onlayn saralash bahslari yakunlandi.
Kecha o‘tgan 1/2 finalda Javohir Sindorov xitoylik Yu Yang Yini 1,5:0,5 hisobida mag‘lub etib, finalga yo‘l oldi. Ikkinchi yarim final musobaqasida FIDE bayrog‘i ostida saralashda qatnashayotgan Yan Nepomnyashiy Sloveniya vakili Vladimir Fedoseyevga 1,5:2,5 ko‘rinishida imkoniyatni boy berdi.
Bu, o‘z navbatida joriy yilning 7-14 fevral kunlari Germaniyaning Vaysenxaus shahrida o‘tadigan “Freestyle Chess Grand Slam Tour-2025” turnirining asosiy bahsida qatnashish uchun kechgan so‘nggi “duel”da Sindorov-Fedoseyevni bir-biriga ro‘baro‘ qildi.
Aytish lozim, “Freestyle Chess Grand Slam” turnirining ortda qolgan saralash musobaqalarida grossmeyterimiz Javohir Sindorov 20 nafar shaxmatchi orasida 7,5 ochko bilan pley-off bosqichiga yo‘l olgan edi. Sindorov 6 g‘alaba va 3 durang bilan qo‘shimcha ko‘rsatkichlar evaziga 3-o‘rinni egallab, pley-off bosqichida qatnashish huquqini qo‘lga kiritgan.
Sindorov pley-off bosqichining 1/8 finalida xitoylik I Veyni 1,5:0,5 hisobida, chorak finalda hindistonlik Rameshbabu Praggnanandxani 2:0 hisobida mag‘lub etgandi.
“Freestyle Chess Grand Slam” turnirining asosiy bosqichiga chiqish uchun o‘tkazilgan final musobaqasining Sindorov – Fedoseyev qarama-qarshiligidagi o‘yin har jihatdan murosasiz kechdi. 5 ta turdan iborat o‘yinning ilk partiyasida Sindorov g‘alabaga erishgan bo‘lsa, ikkinchisida sloveniyalik shaxmatchining qo‘li baland keldi. 3 va 4-partiyalarda murosa yo‘li tanlangan bo‘lsa, 5-partiyada Javohirdan omad yuz o‘girdi va umumiy hisob 3:2 holatida yakunlandi.
Ushbu natija orqali sloveniyalik Vladimir Fedoseyev “Freestyle Chess Grand Slam-2025” turnirining asosiy bosqichida qatnashadigan Magnus Karlsen, Gukesh, Fabiano Karuana, Xikaru Nakamura, Nodirbek Abdusattorov, Alireza Firuzja, Levon Aronyan, Vinsent Keymer va Vishvanatan Anand safiga qo‘shildi.
Uchrashuvdan keyin jurnalistlarga intervyu bergan Fedoseyev Sindorov haqida gapirdi:
“U dunyodagi eng yosh mahoratli grossmeysterlardan biri bo‘lish bilan birga, iqtidor borasida jahondagi nomdor shaxmatchilar bilan tenglasha oladigan, ba’zi jihatlari bilan ulardan ham ustunlikka egaki, men uni raqiblarimiz orasidagi eng kuchlisi sifatida e’tirof etaman”, deya ta’kidladi.
T.Ro‘ziyev,
O‘zA