O‘zbekiston Savdo-sanoat palatasi Qoraqalpog‘iston Respublikasi boshqarmasi tomonidan yoshlarni har tomonlama qo‘llab-quvvatlash, ularning tadbirkorlik sohasidagi faolligini yanada oshirish maqsadida “Yosh tadbirkorlar forumi” tashkil etildi.
Tadbirda biznes faoliyatida muvaffaqiyatga erishgan yosh tadbirkorlar, hunarmandlar va tadbirkorlikka qiziqqan 300 nafardan ziyod yosh ishtirok etdi.
Forumda yoshlar kichik biznes uchun maxsus asbob-uskunalar, qoraqalpog‘istonlik tadbirkor va hunarmandlar tomonidan ishlab chiqarilgan mahsulotlar ko‘rgazmasida ishtirok etish imkoniyatiga ega bo‘ldi.
Shundan so‘ng yosh bo‘lishiga qaramasdan, tadbirkorlik faoliyatida yuksak marralarga erishgan, hozirgi kunda respublikada mashhur brendlariga ega bo‘lgan yosh biznes vakillari ishtirokida master-klass tashkil etildi.
Forumni o‘tkazishda faol ishtirok etgan O‘zbekiston Savdo-sanoat palatasi faol a’zolari, Nukus tumanidagi “Biogumus” fermer xo‘jaligi raisi Sherzod Niyazimbetov, “RBG Company” mas’uliyati cheklangan jamiyat direktori Babur Radjapov, “Karakalpak palace hotel” mas’uliyati cheklangan jamiyat direktori Ikram Yuldashev, “Nukus Ziyada nur” mas’uliyati cheklangan jamiyat direktori Ziyada Utenazarovaga, “Oborudovanie” mas’uliyati cheklangan jamiyat jamoasiga tashakkurnoma topshirildi.
Tadbir ishtirokchilariga san’at ustalarining konsert dasturi namoyish etildi.
Dovud Abibullayev, Maqsad Habibullayev (surat), O‘zA.