Henley & Partners Visa Restrictions Index pasportlar reytingining 2023 yil bo‘yicha yangilangan ro‘yxatida Qozog‘iston 70- o‘ringa ko‘tarildi. Respublika fuqarolari dunyoning 76 ta davlatiga vizasiz safar qilishi mumkin, deb yozmoqda «Kazinform» xalqaro axborot agentligi tashkilot hisobotiga tayanib.

Qozog‘iston pasportining hozirgi xalqaro holati 2022 yildagiga nisbatan uch pog‘onaga yaxshilangan. Reyting agentligining yozishicha, dunyoning eng kuchli pasportlari ro‘yxatida bu yil ham birinchi o‘rin Yaponiya pasportiga berilgan. Kunchiqar mamlakat fuqarolari dunyodagi 227 mamlakatning 193 tasiga vizasiz kira oladi. Singapur va Janubiy Koreya fuqarolari esa 192 ta yo‘nalishga viza olmasdan safar qilishi mumkin.

Afg‘oniston pasporti hamon dunyoning eng kuchsiz pasporti bo‘lib qolmoqda. Reytingda 109 o‘rinni egallagan mazkur mamlakat fuqarolari 27 mamlakatga viza rasmiylashtirmasdan bora oladi.