Мәҳәллелерде жаслардың бос ўақытларын мазмунлы өткериў, спортты ғалаба ен жайдырыў мақсетинде шөлкемлестирилип киятырған спорт жарыслары, олардың спорт пенен шуғылланыўы менен бирге, досласыўы, бир-бири менен пикир алысыўы, соның менен бирге, саламатлығының беккемлениўи ушын да үлкен хызмет атқармақта.
Муҳаммед ал-Хорезмий атындағы Ташкент информациялық технологиялары университетиниң Нөкис филиалында «Бир зыялы-бир мәҳәллеге руўхый қәўендер» сүрени астында усы филиалға бириктирилген 5 мәҳәллениң арасында спорттың волейбол түри бойынша жарыс шөлкемлестирилди.
Жарысқа ҳәр бир мәҳәлледен бир-бирден ҳәм филиалдан бир команда қатнасып өз-ара күш сынасты.
Жарыс жеңимпазлары анықланып, «Таслақ» МПЖ жасларынан дүзилген «Маманбий» командасы биринши, «Шымбай гүзары» МПЖ жасларынан дүзилген «Саҳра спортшылары» екинши, ал «Жолшылар» МПЖ жасларынан дүзилген «Жулдызша» командасы үшинши орынды ийеледи.
Олар шөлкемлестириўшилер ҳәм филиалдың кәсиплик аўқамы тәрепинен арнаўлы диплом ҳәм естелик саўғалары менен сыйлықланды.
Қарақалпақстан хабар агентлиги