Усы жыл 30-июнь күни Нөкис транспорт колледжи жанындағы қурылыс тараўында маман қәнигелерди таярлаў орайының биринши питкериўшилерине сертификат тапсырыў мәресими өткерилди.
Өзбекстан Республикасы Президентиниң 2021-жыл 25-январьдағы қарарына муўапық, усы жылдың апрель айында Қарақалпақстан Республикасы басшылығы ҳәм аймақлық әскерий-ҳәкимшилик секторы тәрепинен Нөкис қаласындағы Транспорт колледжи тийкарында – Арқа-батыс әскерий округи әскерий сәркардалығы қадағалаўында Нөкис қурылыс тараўында маман қәнигелерди таярлаў орайы болып, өз жумысын баслаған еди.
Орайда темир-бетон жумыслары устасы, гербиш өриўши, электро-газ кепсерлеўши, уста, сыбаўшы, безеўши, сантехникалық жумыслар устасы, электро-монтажлаўшы, көтерме кран басқарыўшысының жәрдемшиси, қаплаўшы-плиткашы, полат ҳәм темир бетон конструкциялар монтажлаўшысы, гипсокардон монтажлаўшысы, кран машинисти сыяқлы 13 қәнигелик бойынша билим бериледи.
Илажда 11 бағдар бойынша 3 айлық курсларды оқып тамамлаған 251 питкериўшиге қәнигелиги бойынша халықаралық дәрежедеги сертификат салтанатлы жағдайда тапсырылды. Сондай-ақ, билим алыў процесинде өзиниң зийреклиги, үлгили минез-қулқы менен көзге түскен бир топар питкериўшилерге ҳүрмет жарлығы тапсырылды.
– Орайда барлық қолайлықлар жаратылған. Билимлендириўдиң барлық талапларына жуўап береди. Кәсип ийелеўде жаслар тәжирийбе арттырып, олардың бәнтлигин сезилерли дәрежеде жетилистиреди, – дейди орай питкериўшиси Саламат Базарбаев. – Орайда қурылыс тараўы бойынша билим ҳәм көнликпелер ийеледик. Сондай-ақ, рус ҳәм шет тили, елимиз тарийхы, үрп-әдет дәстүрлери, нызамшылық бойынша дәслепки билимлер берилип, кәсип-өнерге үйретилди. Бундай итибар ҳәм ғамхорлық ушын миннетдаршылық билдиремиз ҳәм келешекте елимиздиң раўажланыўы ушын өзлеримиздиң мүнәсип үлесимизди қосамыз.
Мағлыўмат ушын, орайдағы 13 бағдардың 11 бағдары 3 айлық, қалған екеўи 4 айлық оқыў курсы болып есапланады.
Илаж қатнасыўшыларына Нөкис гарнизоны әскерий оркестри тәрепинен концерт бағдарламасы қойып берилди.
Қарақалпақстан хабар агентлиги