Бердақ атындағы Қарақалпақ мәмлекетлик университетинде Өзбекстан «Миллий тикланиш» демократиялық партиясы Қарақалпақстан Республикасы Кеңеси тәрепинен бирге ислесиўши шөлкемлер менен биргеликте 26-июнь – халықаралық нәшебентликке қарсы гүресиў күни мәнәсибети менен Нөкис қаласындағы жәмлеспеген жаслар арасында мини футбол бойынша «Миллий тикланиш» партиясы кубоги турнири өткерилди.
Турнирди өткериўден мақсет – жасларды миллионлар ойыны болған футболға кеңирек тартыў, бул спорт түрин ғалаба ен жайдырыў, мәҳәллелердеги қәбилетли балаларды анықлаў ҳәм республикамызда спорттың усы түрин раўажландырыў болып есапланады.
Жарыста «Темир жол» МПЖ командасы биринши орынды ийелеп, «Миллий тикланиш» партиясы кубогин қолға киргизди. «Гөне қала» МПЖ командасы екинши, «Алмазар» МПЖ командасы үшинши орынды ийеледи. Жеңимпазлар шөлкемлестириўшилер тәрепинен таярланған арнаўлы диплом ҳәм баҳалы саўғалар менен сыйлықланды.
Қарақалпақстан хабар агентлиги