Президент Шавкат Мирзиёевқа автомобиль санаатында исленип атырған жумыслар ҳәм 2025-жылға мөлшерленген режелер ҳаққында мәлимлеме берилди.

Мәмлекетимиз санаатында автомобиль қурылысының үлеси 10 процентти қурайды. Өткен он айда 338 мың жеңил автомобиль ислеп шығарылған. 1 мың 400 түрдеги комплектлеўши бөлеклер локализацияланған. Экономикалық илажлар нәтийжесинде тараўда өзине түсер баҳасы 4 процент кемейген. Экспорт 455 миллион доллар болған.

«Өзавтосанаат» акционерлик жәмийетиниң баслығы алындағы режелер ҳәм ўазыйпалар бойынша мәлимлеме берди.

Келеси жыл 450 мың автомобиль ислеп шығарыў ҳәм экспортты 700 миллион долларға жеткериў мақсет етилген. Аймақлық кәрханалар менен кооперацияны күшейтип, локализациялаўды арттырыў бойынша анық режелер ислеп шығылған. Атап айтқанда, 700 детальды өзлестириў бойынша 325 миллион долларлық 63 жойбар әмелге асырылады.

Бизге белгили, Жиззақта “BYD” компаниясы менен биргеликте электромобиль заводы қурылған. Ҳәзирги ўақытта бул жерде Chazor ҳәм Song Plus Champion сыяқлы машиналар ислеп шығарылмақта. Келеси жылларда модельлердиң қатарын кеңейтиў режелестирилген. Баҳасы 300 миллион долларлық екинши басқышта электромобильлер санын жылына 200 мың данаға, үшинши басқышта 500 мың данаға шекем жеткериў нәзерде тутылған.

Мәмлекетимиз басшысы қытайлы бирге ислесиўшилер менен келисип, қосымша қуўатлықларды қурыў, электромобильлер ушын комплектлеўши ҳәм аўысық бөлеклерди избе-из өзлестирип барыў бойынша көрсетпелер берди.

Кооперация тийкарында жергиликли кәрханаларға буйыртпаларды қәлиплестириў ўазыйпасы қойылды.

ӨзА