Таэквондоның әдеттеги ITF бағдары бойынша Ташкент қаласында болып өткен Өзбекстан кубоги жарысында Қарақалпақстан сайланды командасы улыўма командалық есапта биринши орынды ийеледи.
Конституция байрамы күни Нөкис темир жол вокзалында спортшылар Қарақалпақстан Республикасы Туризм ҳәм спорт бас басқармасы басшылары, балалар ҳәм жас өспиримлер спорт мектеплериниң тренерлери, ата-аналар ҳәм ғалаба хабар қуралларының ўәкиллери тәрепинен салтанатлы жағдайда күтип алынды. Онда шығып сөйлеўшилер, спортшыларымыздың бул жеңиси Өзбекстан Республикасы Конституциясы байрамына әжайып саўға болғанлығын атап өтти.
Атап айтқанда, Өзбекстан кубогинде республикамыздан 91 спортшы қатнасқан болса, олардан 25 спортшы биринши, 19 спортшы екинши ҳәм 24 спортшы үшинши орынларды ийеледи. Солай етип, сайланды командамыз ағзалары Өзбекстан кубогин жеңип алды.
Қарақалпақстан хабар агентлиги