Республикалық гимнастика түрлери бойынша балалар ҳәм жас өспиримлер спорт мектебинде «Гимнастрада ҳәмме ушын» жарысының қалалық басқышы болып өтти.
Нөкис қалалық Мәҳәлле ҳәм шаңарақты қоллап-қуўатлаў бөлими, Туризм ҳәм спорт бөлими менен биргеликте шөлкемлестирилген илажға улыўма билим бериў мектеплери ҳәм мектепке шекемги билимлендириў шөлкемлеринен 10 команда қатнасты.
Ҳаял-қызлардың саламатлығын беккемлеў, оларды денетәрбия ҳәм спортқа тартыў ҳәм ғалабалығына ерисиў мақсетинде шөлкемлестирилген жарыс жуўмағында 52-санлы мектепке шекемги билимлендириў шөлкеми командасы биринши, 1-санлы улыўма билим бериў мектеби командасы екинши, 37-санлы мектепке шекемги билимлендириў шөлкеми командасы үшинши орынларды ийеледи.
Жарыс жеңимпазларына шөлкемлестириўшилер тәрепинен диплом ҳәм естелик саўғалары тапсырылды.
Қарақалпақстан хабар агентлиги