Бердақ атындағы Қарақалпақ мәмлекетлик университетиниң студенти Дильфуза Исмайлова Қазақстан Республикасы Нур–Султан қаласында болып өткен «Ғәрезсиз мәмлекетлердиң дослық аўқамы мәмлекетлериниң ең жақсы студенти-2021» таңлаўында илим ҳәм билимлендириў тараўы бойынша қатнасып, 1-орынды ийеледи.
Усы мүнәсибет пенен университет ректоры А.Реймов жеңимпаз студент Дильфуза Исмайлованы ерискен жетискенлиги менен қутлықлап, оған алдағы оқыў ҳәм илимий-изертлеў жумысларында табыслар тиледи.
– Жеңимпазы болыў аңсат емес. Ол ушын көп оқып, излениў керек, – дейди Дильфуза.
Д.Исмайлованың илимий басшысы Е.Кутыбаеваның басшылығында алып барып атырған илимий-изертлеў жумыслары бойынша усы күнге шекем 40 тан аслам илимий мақалалары ҳәм тезислери шыққан. Сондай-ақ, ол Уллы Британия, Россия Федерациясы ҳәм Украина мәмлекетлеринде болып өткен илимий-әмелий конференцияларда өз баянаты менен белсене қатнасқан.
Дильфуза халықаралық инглис тили IELTS тестинен B2 дәрежели сертификатты қолға киргизген.
Университетте студентлер арасында өткерилетуғын пән олимпиадаларына қатнасып, бириншиликти ийелеп келмекте. Соның менен бирге, ол Өзбекстан Республикасы Мәлимлеме технологиялары ҳәм коммуникацияларын раўажландырыў министрлиги стипендиясы жеңимпазы.
Т.СЕЙТНАЗАРОВА,
Қарақалпақстан хабар агентлигиниң шолыўшысы