«Ташаббус-2021» таңлаўының районлық, республикалық басқышларында жеңимпаз болған «Muynak Tour» ЖШЖ директоры Амина Бегжанова таңлаўдың Ташкент қаласында өткерилген финальлық басқышына жоллама алған еди.
Ол бул жерде де жеңимпазлар қатарынан орын алып, таңлаўдың «Ең жақсы исбилермен ҳаял» бағдары бойынша биринши орынды ийелеп, биринши дәрежели диплом менен сыйлықланды. Оған Өзбекстан Республикасы Президентиниң саўғасы – «Nexia-3» автомобили тапсырылды.
– «Muynak Tour» ЖШЖ 2017-жыл февраль айында ашылған еди,-дейди А.Бегжанова. – Туристлик агентлигимиз Мойнақ қаласына ҳәм Арал теңизине ҳәм басқа да орынларға жеке түрде ҳәм топарласып саяхатқа шықпақшы болғанларға хызмет көрсетеди.
Хызметкерлеримиз тәжирийбели, тараў бойынша жоқары маманлыққа ийе. Олар турбизнес стандартлары бойынша жумыс алып барады.
Саяхатшылардың қәўипсизлигин тәмийинлеўге, олар ушын ҳәр қыйлы тиллерде сөйлесе алатуғын дилмашлар, автотранспортларын сақлаўға қойыўы ушын парковка, музейлерди, театрларды, көргизбелерди ҳәм басқа да дыққатқа ылайық орынларды таныстырып көрсетиўши шөлкемлестириўшилер, Арал теңизине, Самарқанд, Бухара, Хийўа қалаларына экскурсия шөлкемлестириў, саяхатшыларды аэропортта күтип алыў ҳәм шығарып салыў хызметлерин айрықша дәрежеде көрсетиў ушын ҳәрекет етип атырмыз.
Саяхатшыларға зәрүр болған мийманхана хызмети, авиа ҳәм темир жол билетин, виза алыўға жәрдем бериў, транспорт хызмети сыяқлы буннан басқа да бир қатар хызметлер көрсетемиз.
Сондай-ақ, Мойнақ қаласында Арал теңизиниң ултанында ҳәр бири 3-4 орынлық қара үйлерден ибарат лагерьлеримиз бар. Қарақалпақ, қазақ, өзбек миллий тағамларынан ибарат аўқатларды үш мезгил даўамында қонақларымыз ушын таярлаўға, олардың кеўлинен шығыўға ҳәрекет етемиз.
Бизиң хызметимизди жоқары баҳалап, мени биринши орынға ылайық, деп тапқаны ушын миннетдарман. Алдағы ўақытлары хызмет көрсетиў түрлерин және де көбейтип, жумысларымызды жақсылаўға ҳәрекет етемиз.
Биз де өз гезегинде «Muynak Tour» ЖШЖ директоры Амина Бегжанованы қызғын қутлықлап, алдағы ўақытларда да туризм тараўын раўажландырыў арқалы елимизди таныта бериўине, район экономикасының раўажланыўына үлесин қосыўда күш-ғайрат тилеймиз.
Ә.Жиемуратов,
Қарақалпақстан хабар агентлиги