Тақыятас районындағы 7-санлы Балалар музыка ҳәм көркем өнер мектебинде, район ҳәкимлиги, Республика Руўхыйлық ҳәм ағартыўшылық орайы Тақыятас районлық бөлиминиң басламасы менен, Өзбекстан МТДП, районлық Мәденият бөлими менен биргеликте, райондағы кәрхана, шөлкем ҳәм билимлендириў мәкемелеринде Руўхый-ағартыўшылық жумысларын жолға қойыў мақсетинде «Ең үлгили шөлкем», «Ең үлгили билимлендириў мәкемеси» таңлаўы шөлкемлестирилди. «Тақыятас» кекселер ҳәм нәгиранлығы болған шахслар, урыс ҳәм мийнет нуранийлери командалары беллести.
Илаж даўамында шөлкем, мәкемелердиң жумысында мәмлекетлик тилде ис жүргизиў әҳмийет берилип, ҳүжжетлери слайд ҳәм қағаз вариантларда төрешилер қурамына усынылды.
«Ең үлгили шөлкем» таңлаўында биринши орынды районлық Медицина бирлеспеси, екинши орынды «Тақыятас» кекселер ҳәм нәгиранлығы болған нуранийлер командасы ийеледи. Сондай-ақ, «Ең үлгили билимлендириў мәкемеси» таңлаўында биринши орынды 6-санлы улыўма орта билим бериў мектеби, екинши орынды 3-санлы мектепке шекемги билимлендириў шөлкеми ийеледи.
Таңлаўда жеңимпаз болған ҳәм белсене қатнасқан командалар Республика Руўхыйлық ҳәм ағартыўшылық орайы Тахыятас районлық бөлими тәрепинен таярланған қымбат баҳалы саўғалар ҳәм ҳүрмет жарлықлары менен сыйлықланды.
Азизбек Дабылов,
ҚМУ Интернет журналистикасы
тәлим бағдарының 2-курс студенти
Қарақалпақстан хабар агентлиги