Республикамызда «Басқарыў уйымлары, айрықша жағдайлар мәмлекетлик системасы аймақлық ҳәм функционал төменги системаларының Тәжикстан Республикасы аймағында жайласқан Сарез көли қурылмасының жарылыўы ақыбетинде жүзеге келген айрықша жағдайларда халықты ҳәм аймақларды қорғаў бойынша биргеликтеги ҳәрекетлери» темасында командалық-штаб оқыў шынығыўлары болып өтпекте.
Нөкис Олимпиада резервлери колледжинде илаждың ашылыў салтанаты болып өтти. Онда Қарақалпақстан Республикасы Министрлер Кеңесиниң Баслығы Қ.Сариев, Қарақалпақстан Республикасы Айрықша жағдайлар басқармасының баслығы А.Давлетов өткерилип атырған оқыў шынығыўларының мақсет және ўазыйпаларына тоқтап өтти.
Атап өтилгениндей, Өзбекстан Республикасында Айрықша жағдайлардың алдын алыў ҳәм бундай жағдайларда ҳәрекет етиў мәмлекетлик системаның халықты ҳәм аймақларды тәбийғый және техноген қәсийетли айрықша жағдайлардан қорғаў бойынша быйылғы жылға белгиленген илажларға муўапық өткерилип атырған оқыў шынығыўларының мақсети, Сарез көли қурылмасының жарылыў қәўпи туўылғанда ямаса жүз бергенде тәбийғый ҳәм техноген қәсийетли айрықша жағдайлардың алдын алыў, ақыбетлерин сапластырыўда айрықша жағдайлар мәмлекетлик системасы аймақлық төменги структураларының басқарыў уйымлары, күш ҳәм қуралларының таярлық дәрежесин сынақтан өткериў және биргеликтеги ҳәрекетлерин жетилистириў болып табылады. Соның менен бирге, байланыс ҳәм орайластырылған автоматластырылған хабар бериў системаларының хабарды халыққа ҳәм басшы қурамына исенимли және өз ўақтында жеткерилиўин әмелде сынақтан өткериў, аймақлық басқарыў уйымлары, айрықша жағдайлар мәмлекетлик системасы хызметлериниң биргеликтеги ҳәрекетлер режесине анықлықлар киргизиў, қарар қабыл етиў ҳәм бар күш және қуралларды бөлистириў бойынша ҳәрекетлерди тексериў, халықты айрықша жағдайдар аймағынан эвакуациялаў, көширилгенлер ушын турмыслық зәрүр шараятларды жаратыў, бүлинген аймақларда инженерлик-коммуникация инфраструктураларын тиклеўге таярлық дәрежеси сынақтан өткериледи.
Илаж қатнасыўшылары командалық-штаб оқыў шынығыўларының Нөкис Олимпиада резервлери колледжи аймағында дала майданында жайласқан тийкарғы Ҳәрекетлениў басқарыў пунктинде жаратылған шараятлар менен танысты.
Буннан кейин «Ғарбий» мәмлекетлик унитар кәрханасында «Тәбийғый ҳәм техноген жағдайлар жүз бергенде объектлердиң басшылық қурамы ҳәм пуқаралық қорғаныў структураларының және қалалық Айрықша жағдайлар мәмлекетлик системасы хызметлери менен биргиликтеги ҳәрекетлери»темасында арнаўлы тактикалық оқыў шынығыўы өткерилди.
Үш күн даўам ететуғын командалық-штаб оқыў шынығыўлары даўамында Беруний районы аймағында Әмиўдәрья жағалықларын беккемлеў жумысларын әмелге асырыў, Хожели районы «Саманкөл» аўыл пуқаралар жыйыныда көширилетуғын халықты жыйнаў, «Хожели» темир жол бәндиргисинде халықты ҳәм материаллық байлықларды темир жол жәрдеминде көшириў, Хожели районындағы орайлық стадионда көширилген халықты қабыл етиў, Нөкис қаласындағы «Ашшы көл» аймағында суў тасқыны себебинен жүзеге келген бүлгиншиликлердиң, излеў-қутқарыў ҳәм тиклеў жумысларын әмелге асырыў, жуқпалы кеселликлердиң алдын алыў, жәбирленгенлерге биринши медициналық жәрдем көрсетиў, «Тақыятас нефьт база» унитар кәрханасында тәбийғый ҳәм техноген айрықша жағдайлар жүз бергенде биргеликтеги ҳәрекетлер бойынша арнаўлы тактикалық оқыў-шынығыўларын өткериў режелестирилген.
Д.АБИБУЛЛАЕВ,
Қарақалпақстан хабар агентлигиниң шолыўшысы.
М.ҲӘБИЙБУЛЛАЕВ тың түсирген сүўретлери